92 milyones populasyon sa nasud
CEBU, Philippines - Mikabat na sa 92 milyones kapin ang katibuk-ang populasyon sa nasud karon sumala sa Population Commission (Popcom) kagahapon.
Matud ni Michael Pacios, sa buhatan sa Popcom nga kini maoy pakan-onon sa kagamhanan sa tanang adlaw.
Apan miingon si Pacios nga samtang nag-anam kadaghan ang molupyo sa nasud nagkaapiki usab ang lugar nga katamnan karon. Ang nag-una nga gikonsumo sa mga Filipino mao ang humay ug ikaduha lang ang mais.
Maoy hinungdan nga tungod sa tinguha nga makapakaon ang kagamhanan sa nasud ning maong gidaghanon, kauban ang Popcom sa hugot nga pagpatuman sa pagplano alang sa pamilya.
Hinuon sa tulumanon sa Kapihan sa PIA kagahapon didto sa buhatan sa Department of Health (DOH)7, si Pacios nagkanayon nga ang tanan halos nasayud na bahin sa balaod nga may labot sa pag-atiman sa pamilya.
Miingon si Pacios nga kun ang matag pamilya mosagop lamang sa mga paagi nga magtudlo kanila sa pag-limite sa gidaghanon sa anak, malagmit di kaayo maapiki ang nasud sa pagkaon sa umaabot nga panahon.
Base sa pamahayag sa taga Department of Agriculture, nasayran nga samtang nag-anam kadaghan ang katawhan sa nasud nag-anam usab kadyutay ang yuta nga katamnan og humay.
Kini gumikan sa pagpauswag sa housing project ug uban pang mga kagamitan sa mga kapatagang bahin nga unta tamnanan pa og makaon.
Ang humay maoy nagsilbi nga pagkaon nga gisandigan sa kasamtangang populasyon sa nasud nga kuwang kaayo, sumala ni Pacios. Busa miingon si Pacios nga gumikan sa kasamtangang kahimtang sa pagkaon nga kuwang kaayo, ang kagamhanan mogasto og dakong salapi sa pagpangangkat og humay gikan sa gawas.
Nakaingon si Pacios nga wala kini matan-aw sa katawhan kay alang kanila sayon ra ang pagkaon ning kasamtangang populasyon sa kahimtang sa kaumahan sa Pilipinas nga kuwang ang gidak-on. (BANAT NEWS)
- Latest
