CV kuwang sa supply sa bugas

CEBU, Philippines - Gipahayag  sa Department of Agriculture (DA)7  nga kuwang  kaayo  ang  supply  sa bugas  sa rehiyon 7.

Si Grace Dagala  sa   tulumanon  Kapihan  sa PIA  nga gipalanog  sa DYMR  Radyo ng  Bayan  Cebu  kagahapon  sa buntag  miingon  nga  sa  Central  Visayas  may pito  ka  milyon  ang  populasyon.

Apan  matud pa  niya  nga  27  porsento  lang  ang  supply  sa bugas  nga  gikunsomo  ning  mga  tawhana  sa pagkakaron.

Gumikan  niini  ang  gisuplay nga  panginahanglan sa  bugas  sa  maong  mga  molupyo  naggikan  sa ubang  rehiyon sa nasud  matud  pa  ni  Dagala.

Pipila sa hinungdan  niini,  mao ang  kakuwang sa  tamnanan  og  humay  dinhi  sa maong  rehiyon.

Ang  Central  Visayas  gisakpan sa   upat  ka  lalawigan  sama sa Bohol, Negros  Oriental,  Siquijor  ug  Cebu.

Apan  matud  pa  ni Dagala  nga  sa  maong  mga  lalawigan  ang  Bohol  ra  ang  may  maayong  lugar  nga  sarang  katamnan  og  mga  humay.

Gisundan  kini  sa Cebu  diin  mapili  lang  ang  mga  dapit  nga  may  kahumayan  sama sa Carcar, Pinamungahan,  ug  Barili.

Sa  pagkakaron  gidasig  ni  Dagala  ang  mga  mag-uuma  sa  pagpalabong  usab  sa ilang  mga  tanom  nga  lagutmon  sama sa saging,  kolo, kamoteng kahoy,  kamote  ug  uban  pa.

Kini  tungod  kay pipila kini  sa makaon  nga  mohatag  usab  og carbohydrates  sa  lawas  sa tawo. Iya  usab  nga  gidasig  ang  mga  batan-on  sa pagkat-on  pagkaon  og  lagutmon, utanon  ug prutas.

Nasayud si  Dagala  nga  mayoridad  sa  mga  batan-on  karon  nga  ania  na sa urban  areas  halos  di  na  makaila  og  mga  lagutmon.

Kini  tungod  kay  natabunan  sa ilang  makita nga  pagkaon  gikan sa  mga  fast food  restaurants,  matud  pa ni  Dagala. (BANAT NEWS)