Logo contest ilusad sa DSWD

CEBU, Philippines - Ang Department of Social Welfare and Development (DSWD) 7 mopahigayon og usa ka logo-making contest alang sa National Community-Driven Development Program (NCDDP).

Matud pa ni Simeon Remata III, Social Marketing Officer sa DSWD-7 nga  sayo ning tuiga, ang NCDP naaprobahan isip usa ka nasudnon  nga programa sa National Economic Development Authority (NEDA) Board ug nga ang DSWD 7 anaa sa proseso sa pag-brand sa maong programa diin nahilakip ang logo contest.

Dugang pa ni Remata nga ang maong contest ipahigayon gikan sa Hulyo 12 hangtod Hulyo 26 ning tuiga diin abli kini ngadto sa mga magtutungha sa kolehiyo ug unibersidad.

Gipadayag ni Remata nga ang desinyo nga makadaog pagagamiton isip opisyal nga logo sa nasudnon nga programa sa DSWD ug nga ang mahimong mananaog nga designer makadawat og P10,000 nga kantidad isip cash prize ug usab trophy.

Gisaysay ni Remata nga kinahanglang mapakita ang kamahinungdanon sa NCDP ug nga adunay ngalan sa maong disenyo  nga motakdo  sa imahe sa DSWD.

Sumala pa ni Remata  nga ang  maong disenyo mag-agad sa pilion sa entrante sama sa digital, acrylic paint ug watercolor apan ang final nga kopya kinahanglang isumiter sa digital nga format.

Ang interesado  niining  maong bangga kinahanglang mosalmot  sa oryentasyon sa NCDP karong umaabot nga Hulyo 12 ning tuiga sa alas 5:00 sa hapon hangtod alas 7:00 sa gabii didto sa Conference Room sa DSWD 7 nga anaa mahimutang sa corner MJ Cuenco Ave. ug Gen. Maxilum Avenue, Barangay Carreta sa syudad sa Sugbo.

Gibutyag ni Remata nga ang maong oryentasyon dili lamang mahitungod sa contest apan pagahisgutan usab ang kalabot sa mga impormasyon sa programa sa NCDDP. (/WC)  (BANAT NEWS)