Kasong parricide gipasaka na batok ni Labrador

CEBU, Philippines - Napasaka na sa korte ang kasong parricide batok kang William Labrador Jr. kinsa gipasanginlang mipatay sa iyang asawa niadtong miaging semana sulod sa ilang balay.

Si Prosecutor Petronio Elesterio nakakita og igong basihanan  sa pagpasaka sa kaso batok kang Labrador, nga taga Lucimba, Poblacion, Ward 4, Minglanilla, Cebu human   kini  mibaliwa  sa iyang  katungod  sa  pagsang-at  og  pang-alkontra  nga  pamahayag. Ang  korte  wa  morekomendar  og  piyansa  batok  sa akusado.

Si Anthony Bastatas, amahan sa biktima   nga si Anna May, 23, miingon  nga nakamata sila niadtong Hulyo 3 sa alas 10:00  sa gabii human sila pukawa sa ilang silingan ug nagpahibawo  nga ang ilang  umagad  nga  si William gidakop sa  kapolisan.

Diha-diha matud niya miadto sila sa balay sa iyang anak   ug  didto  iyang   nasuta nga gipatay ang iyang anak sa akusado.

Ang 4 anyos   nga anak  sa magtiayon   nagkanayon nga niadtong higayona  nagkalalis  ang  iyang inahan ug amahan   nga  misangpot  sa  pagkamatay  sa  iyang  inahan.

Matud niya   nga ila gayud  nga nasaksihan  ang  pagpusil  sa  ilang  amahan  ngadto  sa ilang  inahan.

Pagkahuman, matud niya naabot ang mga polis ug gihatud  ang  iyang inahan ngadto sa hospital.

Si Anna May giingong  gikan sa usa ka birthday party ug  miuli kini   nga  gabii na.

Basi sa imbistigasyon  sa kapolisan , ang akusado mitugot  sa  iyang  asawa  human  kini  mananghid  nga motambong   og birthday party. Hinuon  gitugon  kini  nga  mouli  og sayo  apan  naabtan  og  alas  10:00  ang  pag-uli  sa   biktima  nga  gituohang  maoy nasuk-an  sa suspek. (BANAT NEWS)