Prolife naghandom og ‘milagro’ sa RH Law

CEBU, Philippines - Grupo sa Cebu Pro-life Alliance nagpahigayon og rally kagahapon sa buntag atubangan sa Marcelo Fernan sa Palace of Justice agi og pagpadayag sa ilang kahinam sa resulta sa desisyon sa Korte Suprema kun legal ba ang Reproductive Health (RH) Law.

Sa sayo pa, ang Pro-life Philippines Foundation Inc. et.al mipasaka og “petition for certiorari and prohibition with prayer for a temporary restraining order and/or writ of preliminary injunction” didto sa Korte Suprema  aron ibasura ang Republic Act 10354 (RH Law).

Si Dr. Rene Josef Bullecer nagkanayon nga ang pagpahigayon og rally kay usa lamang ka preparasyon sa adlaw sa paghukom karong adlawa.Matod niya nga naglaum sila nga malamdagan ang mga hunahuna sa 15 ka huwes sa ilang paghimo og desisyon bahin sa RH Law nga giisip sa grupo ni Bullecer nga dakong supak sa pagtulon-an sa simbahan. Ang petisyon sa pro-life groups nagkanayon nga ang RA 10354 usa ka unconstitutional tungod kay nakalapas kini sa religious freedom base sa Bill of Rights ug nakalapas kini sa “inherently pro-family nature of the Constitution.”

Matod ni Bullecer nga sila nagalaum nga dunay miracle nga mahitabo karun. Niadtong Disyembre 21, 2012 napirmahan ni Presidente Benigno Aquino III ang RH Bill into law. Apan ang maong balaodnon wala ma- implementar hangtud di makadesisyon ang Korte Suprema.  (BANAT NEWS)