P1.5M shabu nasakmit

CEBU, Philippines - Walo ka mga nalambigit sa illegal drugs trade usa nila giingong level-2 drug pusher ang nadakpan sa mga sakop sa National Bureau of Investigation (NBI)-7 kagahapon sa hapon diha sa Barangay Talamban, Cebu City.

Si Atty. Bernard dela Cruz, ang agent sa maong kaso mibutyag nga duha ka buwan nilang gi-surveillance ang suspek nga si Jhonilito Mayol kinsa maoy ilang target sa maong buy bust.

Matud pa  niya, lisod dakpon si Mayol tungod kay daghan siya og “spotter” apan nataymingan ra gihapon nila kini kagahapon sa malampusong buy-bust operation.

Sumala pa nga si Mayol maoy tigsuplay og illegal nga drugas sa mga barangay ug sa usa ka unibersidad diha sa Talamban.

Lakip sa nadakpan giila ni Dela Cruz nga mao sila si Anna Roa kinsa mao ray nag-inusarang babaye nga nasikop.

Matud niya nakuhaan niya og usa ka dakong paketeng shabu si Roa.Samtang ang ubang nadakpan mao sila si Romeo Baylon, Junrey Ansero, Archie Cabrellos, Ferdinand Jugador, Jonathan Cortes ug Christopher Dizon.Nakuha gikan sa mga suspek ang lima ka dagkong pakete nga may sulod nga gidudahang shabu ug lima usab ka gagmay’ng pakete nga may sud niini, ang tanan may gibug-atong 400 gramos ug gibanabanang mobalor og P1.5 milyon.

Lakip sa nakuha gikan sa maong operasyon ang usa ka M16 Rifle ug mga bala niini. (BANAT NEWS)