Warwick Barracks Market problema sa city hall

CEBU, Philippines - Ang Warwick Barracks Market nga anaa mahimutang sa tunga-tunga sa Freedom Park ug Carbon Market Unit-1 maoy numero uno nga problema sa City Market Office.

Samtang gibalik-balik ni Mayor Michael Rama nga gusto niya nga palamboon ang maong merkado apan daghan sa iyang mga alalay ang nakapanglingo-lingo nga naghuna-huna.

Ang Banat News misuway paghimo’g kinaugalingon nga pakisusi sa mao nga lugar kagahapon  ug nasuta nga dili na merkado ang mao nga lugar kun dili kabalayan.

Si Market Administrator Raquel Arce mitug-an nga wala na gani sila mangolekta og arkabala sa mga nag-ukopar sa sulod nga bahin sa Warwick Barracks Market.

 Ang koleksyon sa market fees gikan sa Warwick Barracks Market kaniadtong 2010 miabot lang og P658,147, unya nanaog kini ngadto na lang sa P558,488 pagka 2011 unya misaka’g balik sa P594,232 sa miaging tuig.

Apan gipasabot ni Arce nga ang nakolektahan nila og arkabala ug abang mao ra kadtong anaa maninda palibot sa mao nga merkado kay ang tua sa sulod dili na mamayad kay kuno sila wala maninda. Basi sa rekord sa Market Operations Division, ang Warwick Barracks Market maoy labing minus og koleksyon kun itandi sa ubang kamerkadohan dinhi sa dakbayan.  (BANAT NEWS)