Driver giluba patay sa silingan

CEBU, Philippines - Nadunggaban patay sa usa ka senior citizen ang usa ka  drayber  sa traysikol nga  iyang  silingan didto sa  barangay Pold Bago Bago, sa lungsod sa Asturias kagahapon sa alas 12:00 sa sayong kaadlawon.

Ang biktima mao si Recardo Dalogdog, 33, minyo, lumad nga taga Negros ug nagpuyo na sa maong lugar human maminyo og taga Asturias,  ug usa ka drayber sa traysikol.

Ang suspek mao ang usa ka Avelino Trocio, 72, minyo, usa ka mag-uuma ug nagpuyo usab sa maong lugar.

Si PO2 Ariel Taguiam sa Asturias Police  Station mibutyag  sa Banat News  nga  ang biktima didto sa ilang silingan tungod kay naghikay kini agi  og  pangandam sa anak niini nga mamaye unta didto sa siyudad sa Naga kagahapong adlawa.

Apan samtang nag-inum –inom,  miabot   ang  suspek   nga hubog na.

Misalmot  kini  sa  estorya apan ang ilang mga kauban wala makasabot sa gi-estoryahan sa biktima ug  sa suspek tungod kay nag-Ilonggo speaking man ug  namatikdan   nila  nga naglalis kini.

Pipila ka gutlo  ang  milabay, kalit  nga giluba  sa suspek  ang  biktima   tumong sa dughan, ug wala pa matagbaw giusban pa kini og dunggab sa lawas nga bahin dayung  pahilayo sa  maong  lugar.

Ang biktima gihatud   dayon  ngadto  sa Balamban District Hospital apan gideklarar   kini nga Dead on Arrival (DOA) didto.

Samtang ang suspek boluntaryong mitahan sa kapolisan  sa lungsod  human sa hitabo ug nagtingkagol na karon sa karsel samtang gihikay pa ang tukmang sumbong nga ipasaka batok   kaniya.

Personal nga bangi tali sa biktima ug suspek ang gituohang motibo sa krimen. (BANAT NEWS)