Pangrakrak 1 patay, 1 angol

CEBU, Philippines - Natusak  sa mga  bala  ug  namatay  ang  usa ka lalaki, samtang  kritikal  ang  kauban niini  dihang girapido  sila  sa mga armadong  lalaki  didto sa Spring Village, sa Upper Pakigne lungsod sa Minglanilla niadtong Sabado sa gabii.

Ang biktima nga namatay diha-diha human matusak tusak sa bala ug gitiwasan pa og pusil sa ulo mao si Edilberto Enriquez Jr., 42, minyo,   nga taga barangay Inayagan siyudad sa Naga.

Samtang ang laing biktima nga anaa ron sa talandugon nga kahimtang sulod sa tambalanan mao si Samuel Bellaber, 51, minyo ug nagpuyo ra sab sa maong lugar.

Sayo  niini upat ka   wala  hiilhing  mga  lalaki nga nagsakay  sa  Isuzu Crosswind maoy  mirakrak  sa  ilang  mga  armas  ngadto  sa  mga  biktima.

Si PO1 Welmer Campo sa Minglanilla Police Station mibutyag  sa  Banat News   nga  ang mga biktima kauban sa mga barkada  niini nag -inom gawas sa usa  ka tindahan nga daplin sa karsada  sa Spring Village.

Apan samtang sila alegri  kaayo  nga naghisgot  sa  ilang  mga  kaagi, kalit lang miabot ang usa ka  sakyanan  nga  giluwanan  sa  mga  kriminal.

Dihadiha  walay  mga  estorya  nga  migawas  sa ilang  baba, iya-iya  og  lanit  sa ilang  armas  de fuego  ug  gipamusil  ang  nagpundok  nga  mga  lalaki.

Dihang  nasabak  na si  Enriquez  ug si Bellaber,  nanaug   sa sakyanan  ang  tulo  ka  kriminal   ug  giduol si Enriquez dayon  gitiwasan  pagpusil  sa ulo ang biktima.

Dihang  mituay  kini, namalik  sa sakyanan  ang  maong  mga  lalaki dayong  pahilayo  sa maong  lugar.

Apan  bisan  kun patay  na si Enriquez tungod   kay  nabulit  sa  mga   samad pinusilan   ang lawas  ug  ulo niini  gidala  pa kini sa  mga  barkada uban kang  Bellaber  ngadto  sa Minglanilla District Hospital.

Apan  gi-transfer dayun   kini  ngadto  sa Vicente Sotto Memorial Medical Center (VSMMC) sa dakbayan  sa  Sugbo ug padayon pang gi-atiman  ang  samaron.

Ang kapolisan nakapunit  og daghang  mga  kapsula  sa bala  sa kalibre .45  nga  pistola, M-16 armalite rifle, ug 9mm pistola nga gituohang gikan sa armas sa mga kriminal.

Gituohan nga kontra ni Enriquez ang mga namusil  kanila  ug napagan lang ang biktima nga si Bellaber apan wala pa matino kun unsay motibo niini kay padayon pa ang subsub nga imbistigasyon sa kapolisan. (BANAT NEWS)