P1 milyon nga budget matag konsehal gihangop

CEBU, Philippines - Ang majority floor leader sa konseho sa dakbayan sa Talisay mihangop sa plano ni Mayor Johnny De los Reyes nga mogahin og P1 milyon nga budget sa matag konsehal sa siyudad.

Si Konsehal Richard Francis “Choy” Aznar nga nahinabi sa mga tigbalita mibutyag nga daku kaayo ang ilang kalipay  bahin sa saad sa mayor nga hatagan ang matag usa kanila  sa maong  budget.

Matud ni Aznar nga kung  adunay mangayo  kanila og tabang kahatagan na dayon nila kini.

Giangkon ni Aznar nga usahay dili sila makahatag dayon og tabang sa mga nagkinahanglan tungod kay maglisud sila sa budget.

Usahay midugang  siya  nga  mokuot na lang sila sa ilang kaugalingong   kuwarta  kun may moduol  kaniya nga  magpakiluoy  og  tabang.

Si Aznar kinsa second termer nga konsehal sa Talisay nagkanayon nga sukad sa iyang paglingkod sa katungdanan karon pa siya makasuway nga ang mayor misaad nga mohatag og budget   sa matag konsehal.

Ug isip chairman sa committee on health,  ang budget nga mahatag kaniya  iyang  igahin      alang sa mga tambal nga iyang mahatag sa mga nanginahanglan.

 Gawas niini maggahin usab siya alang sa mga mangayo og budget sa pagpatukod og poso  sa kabarangayan ug pagtaud og mga suga.

Si Aznar midugang nga ang tanang programa sa mayor nga makahatag og kaayohan sa mga Talisaynon suportahan nila kini.

Sa laing bahin, si De los Reyes nagkanayon nga ang budget unya nga  iyang ihatag sa mga konsehal  kinahanglan may  liquidation aron dili maabusohan.

Sa samang  higayon   mahibaw-an usab kung unsay gigamitan   sa kuwarta  busa  dili sila maproblema ngadto sa Commission on Audit (COA).

Giklaro ni De los Reyes nga ang maong budget nga iyaha unyang iapod-apod sa mga konsehal adto kini kuhaon sa development fund.

Tumong sa mayor sa mao niyang plano aron dili na mahago o malangan og huwat kaniya ang mga buot mangayo og tabang.

Si De los Reyes midugang nga ang mga konsehal na ang mag-igo sa mga proyekto nga ilang gahinan sa maong budget.  (BANAT NEWS)