Sr. citizen modawat na'g P1,000

CEBU, Philippines - Mokabat sa 10,000 ka mga rehistradong senior  citizen  sa dakbayan sa Mandaue ang   gitakdang  modawat  na  sa ilang mid-year financial assistance  sugod  ugma, Hulyo 8.

Ang pagpanghatag  niini  adto  himoa    sa Mandaue City Cultural and Sports Complex nga   magsugod sa ala 1:00 ang takna sa hapon .

Si Joseph Pialago,  usa ka  social worker sa City Social Welfare and Services (CSWS) mibutyag nga ang mga senior citizen  sa barangay Centro, Cambaro, Guizo ug barangay Mantuyong maoy gitakda   nga  modawat sa ilang  tag  P1,000 nga financial assistance ugma.

Dugang pa niya nga  himoon ang ceremonial distribution ni Mayor Cortes   nga  tambongan  usab  ni Konsehal Jefferson Ceniza.

Si Ceniza  maoy chairman sa konseho sa social services ug usab   si Bise Mayor Glenn Bercede ug  mga konsehales  nga  motambong  usab  sa maong  pagpanghatag

Si Pialago miingon nga sa   Martes ang personnel sa buhatan sa tresurero sa dakbayan maoy mosuroy sa nagkalainlaing kabarangayan alang sa pagpadayon sa pag-apud-apod sa nahisgotang financial assistance sa mga senior citizen.

Naglakip sa mga  senior  citizen  nga  modawat  sa ilang  hinabang  mao  ang  tua  sa  barangay Alang-Alang, Umapad, Opao, Looc, Paknaan ug barangay Labogon.

Sa Hulyo 10   modawat  na  usab  ang barangay Ibabao-Estancia, Basak, Jagobiao, Canduman, Maguikay ug  Cabancalan.

 Samtang  sa Hulyo 11 ang barangay Tabok, Pagsabungan, Tingub, Cubacub, Casili ug Tawason.

Sa Hulyo 12 ang mga senior citizen nga makadawat mao ang taga barangay Tipolo, Subangdaku, Bakilid I, Bakilid II, Casuntingan ug barangay Banilad.  (BANAT NEWS)