PDAF ni Pabling gihangyo sa mga mayor
CEBU, Philippines - Nangayo og patas ug angay nga bahin ang mga mayor sa segundo distrito sa lalawigan sa Sugbo sa Priority Development Assistance Fund sa ilang kanhi kongresista, Pablo “Pabling†Garcia, nga anaa karon sa Kapitolyo balor og P72.8 million.
Hinuon wala mahisguti ang maong isyu atol sa pagpakigtagbo sa mga mayor nga kaalyado ni Garcia kang Gob. Hilario Davide III sa miaging semana sa Kapitolyo.
Malaumon hinuon si Dalaguete Mayor Ronald Alan Cesante nga ipagawas ni Davide ang maong pundo ni Garcia nga alang sa kalungsoran sa ilang distrito.
Gipasabot ni Cesante nga wala lang nila hisguti kang Davide sanglit ang ilang tumong mao man lang ang pagpadayag og suporta sa bag-ong administrasyon.
Kauban ni Cesante nga kaalyado ni Garcia sa segundo distrito sa ilang pagbisita kang Davide mao sila Mayor Nicomedes delos Santos sa Alcoy, Ronald Guarin sa Oslob, Mariano Blanco III sa Ronda, Inocentes Cabaron sa Moalboal, Dean Michael Singco sa Ginatilan, Robbert Librando sa Badian ug Lito Narciso Creus sa Malabuyoc.
Sila giubanan ni Argao Mayor Edsel Galeos ug Bokal Peter John Calderon kinsa mga kaalyado ni Davide sa Liberal Party.
Si kanhi gobernador, Kong. Gwendolyn Garcia, misuway unta pagpagawas sa pundo sa iyang amahan sa katapusang adlaw sa iyang termino sa Kapitolyo alang sa kalungsoran sa segundo distrito apan napakyas kay wala motunga ang provincial treasurer nga mopirma sa voucher.
Giingong gipugngan ni Bise-Gob. Agnes Magpale ang pagpagawas sa maong pundo dihang nasuspenso si Garcia sulod sa unom ka buwan. (BANAT NEWS)
- Latest
