Pagpili sa lider sa LMP di pinaagi sa partido

CEBU, Philippines - Dili pinasubay sa partido ang pagpili unya sa mahimong pangulo sa League of Municipalities in the Philippines – Cebu Chapter sumala pa ni Dalaguete Mayor Ronald Alan Cesante sa One Cebu Party.

Matud pa ni Cesante ang desisyon gyud sa kadaghanan sa mga mayor kung kinsa kanila ang makahiusa sa tanang mayor ang mapili, dili tungod kay sakop sa One Cebu o kaha sa Liberal Party

Si Cesante niluwat sa maong pamahayag isip tubag sa pangutana kung ang One Cebu nga gipangulohan ni Kong. Gwendolyn Garcia motuboy ba og kandidato alang sa LMP.

Human sa miaging eleksiyon sa Mayo 13, nasuta nga ang LP ug One Cebu adunay tag 22 ka mayor sa lungsod samtang usa ang midaug nga independente.

Ang upat sa LP, duha sa One Cebu ug usa ka independente nga mayor sa syudad dili sakop sa LMP kundili sa League of Cities of the Philippines (LCP).   

“Di nato i-picture nga partisan ang LMP election basin og mabutang nga awkward position ang uban,” sumala pang Cesante.

Midugang si Cesante nga ang One Cebu wala pa naghisgut sa bahin sa eleksiyon sa LMP apan nakadungog na sila sa ubang mayor nga interesado.

Usa niini si Tuburan Mayor Democrito “Aljun” Diamante kinsa gisuwayan unta pagtuboy sa LP niadtong 2010 alang sa LMP apan mibalibad sanglit una pang higayon nga siya napiling mayor.

Laing gikataho  nga  nagtinguha sa posisyon sa LMP mao si Samboan Mayor Joseph Raymond Calderon.

Ang duha giingong nagpaabot pa sa pag-endorso sa pangulo sa LP sa lalawigan sa Sugbo, Gob. Hilario Davide III.  (BANAT NEWS)