Romana gipatangtang ni Garbo gikan sa NOPPO

CEBU, Philippines - Gipatangtang ni Police Regional Office (PRO)-7 Director Marcelo Garbo si Senior Superintendent Noli Romana isip direktor sa Negros Oriental Provincial Police Office.

Gawas nga iyang gipatangtang si Romana sa katungdanan, isugyot pa ni Garbo ngadto sa kadagkoan sa Camp Crame nga kini ibalhin pagdistino sa laing rehiyon.

Si Mayor Michael Rama kinsa gusto gayud nga si Romana anhi madistino isip hepe sa kapolisan sa dakbayan sa Sugbo wala kaayo mohatag og igo nga pagtagad kay maghuwat ra siya sa lakang ni PNP Chief Allan Purisima.

Ang report nagkanayon nga ang pagtangtang ni Garbo  kang Romana gikan sa Negros nagumikan sa kapakyas niya paghimo’g hugtanay nga kampanya batok sa illegal nga  sugal dihang siya pa ang direktor sa NOPPO. Mga opisyal sa PRO-7 nagkanayon nga si Garbo mihimo lang sa iyang katungdanan tungod kay siya ang nagsuperbisar sa mga opisyal dinhi sa Central Visayas.

Gusto si Rama nga si Romana maoy matudlo nga direktor sa CCPO ug modumala sa kapin sa 900 ka polis dinhi sa dakbayan kay siya ang girekomendar sa iyang classmate nga si kanhi CCPO direktor Melvin Ramon Buenafe. Si Rama mipili na sa ngalan ni Romana nga maoy itudlo nga direktor sa CCPO apan naghuwat pa sa appointment order gikan sa Camp Crame.

Apan matud ni Mayor Rama nga pakigtagboan niya ang labing minus 200 ka polis nga ania madistino sa dakbayan aron nga iyang pasabton sa iyang mga programa nga mogiya kanila sa ilang mga gimbuhaton. (Rene U. Borromeo/WC) (BANAT NEWS)