Jail Warden sa toledo gipusil patay

CEBU, Philippines - Patay diha -diha ang jail warden sa Toledo City Jail  ug kritikal  ang kahimtang sa usa ka babaye  nga jail guard  human  sila  pusila sa usa ka kauban  nila  nga  polis  didto sa ilang buhatan sa barangay Landahan, lima ka kilomero gikan sa highway kagahapon sa mga alas  12:00 pasado sa udto.

Ang biktima nga dead on arrival (DOA) sa Toledo City District Hospital mao si Jail Inspector Anacleto Dusaran, hingkod,  samtang  ang anaa  sa talandugong  kahimtang   mao  si JO1 Milamed Abella, hingkod, pulos taga  dakbayan sa Toledo.

Ang suspek mao ang ilang kauban nga si JO3 Donald Isidore Ramas, hingkod  ug molupyo sa barangay Cabitoonan, siyudad sa Toledo.

Si SPO4 Carmilito Hornales sa Toledo City Police   Station mibutyag  sa Banat News  nga ang  pagpamusil   nahitabo didto gyud sa buhatan sa Toledo City Jail ug nahibaw-an nila ang maong panghitabo mga ala 1:45 na sa hapon.

Kini human maghangos nga miabot sa ilang buhatan si JO3 Ramas nga mitahan sa iyang kaugalingon ug mitug-an nga iyang napusilan patay ang iyang labaw dungan ang pagtugyan sa iyang service firearms nga 9mm pistol   nga  naglakip  sa   duha ka back up magazine niini.

Si SPO4 Hornales   miingon  nga  ang suspek mihangyo  nga mo-apply og leave of absence  aron mag- schooling, apan giingong gibalibaran sa biktima nga maoy nakaingon sa miulbo nga lalis   nga  misangpot sa dakong  away. Gumikan sa kainit na  sa maong  away,  unang  mipusil  ang suspek  ngadto sa biktima  sa  makadaghang higayon.

Ang biktima   nasabak  sa  nagkalainlaing  bahin  sa lawas   nga  maoy  hinungdan  sa  hinanaling  kamatayon  niini  ug  wala pa hinuon matino kun nakabawos ba kini og pusil.

Samtang si JOI Abella naigo  sa saag nga bala  tungod kay didto  man  kini  sa sulod  sa opisina  sa jail warden dihang nahitabo  ang lalis nga nisampot sa pagpamusil.

Ang nurse on duty sa Toledo City District Hospital nga nagdumili   sa  pagpaila sa iyang  ngalan sa publiko mibutyag dihang nahinabi sa Banat News nga mga alas 2:15 naabot sa tambalanan ang biktima.

Matud  sa maong  nurse  nga  gideklarar dayon kini nga DOA samtang si JO1 Abella gihulagway   sa talandugong  kahimtang ug dali   nga  gihatud  ngadto sa South General hospital sa siyudad sa Naga.

Padayon pa ang imbistigasyon sa kapolisan sa maong panghitabo ug gi-asikaso na usab ang pagpasaka og tukmang sumbong batok sa suspek.(Darrel A. Carumba/WC)(BANAT NEWS)