Bayong-bayong nasikop nga may shabu

CEBU, Philippines - Nadakpan  sa kapolisan  ang  usa ka  bayong-bayong    nga  nagluklok  og  tulo  ka putos  nga shabu   didto sa Olivar St., Poblacion siyudad sa Danao niadtong Huwebes sa alas 11:00 sa gabii.

Ang nasikop mao si Roy (di tinuod nga ngalan), 17, ulitawo, ug nagpuyo sa sitio Pulang Bato, barangay Looc siyudad sa Danao

Si SPO2 Ildefonso Prosia sa Danao City Police  Station mibutyag  sa Banat News  nga  ang  iyang  mga  kauban  nagpahigayon og operasyon batok   sa illegal nga kalihukan  nga gipangulohan sa ilang Deputy Chief nga si Insp. Romeo Caacoy Jr.

Sa pag-abot nila sa maong lugar,  nakit-an niini ang tulo ka tawo nga  adunay transaksiyon ug ila lang kining gipanid-an.

Dihang mitunol na og kwarta ang bayong-bayong, dayon gidawat niini   ang tulo ka putos nga gidiling drugas  giduol dayon sa  mga polis.

Apan   daling  nakamatikod ang mga target   ug nag- iyahay sila  sa pagpanagan ilabina ang gituohang drug pusher .

Ang suspek nga bayong-bayong  maoy naapiki ug nadakpan sa mga polis ug nakuha ang nahisgutang mga ebidensya   gikan  kaniya.

Ang suspek nabalhug  na karon sa karsel samtang gipangayoan   kini og birth certificate aron pagtino kun tinuod ba gyud kining menor de edad.

Samtang gihikay ang tukmang sumbong nga ipasaka batok kaniya. (/WC). (BANAT NEWS)