Ginang napatay sa bana

CEBU, Philippines - Patay nang nadangat sa tambalanan ang usa ka ginang human giingong aksidenteng napusilan sa bana atol sa ilang linayogay tunga-tunga sa ilang panag-away sa milabay’ng gabii diha sa sitio Lusimba Poblacion Ward 4 lungsod sa Minglanilla.

Ang biktima giila nga si Anna May Labrador, 23, kinsa nakaangkon og samad pinusilan sa iyang walang bahin sa dughan human mibuto ang armas nga ilang giilogan sa iyang bana nga si William Labrador Jr., 25.

Sa pakighinabi sa Banat News sa imbestigador sa maong kaso nga si SPO1 Romeo Barde sa Minglanilla Police mipadayag kini nga gikan pa ang biktima ug duha ka mga anak sa birthday party iyang pag-umangkon.

Apan sa ilang pag-abot wala siya maablihi sa suspek maong nahitabo ang ilang panaglalis. Apan gumikan sa kainit sa ilang away gikuha sa suspek ang usa ka Frontier revolver ug gitionan ang biktima aron hadlukon.

Dihadiha giingong nakiglayog ang ginang aron kuhaon ang armas apan aksidente kining nibuto ug naigo ang walang bukton sa suspek apan milapos ang bala ngadto sa walang dughan sa ginang.

Patay na kini pag-abot sa Minglanilla District Hospital. Ang suspek gidala sa mga kaparyentihan ngadto sa kapolisan ug gikatakdang pasakaan og kaso karong adlawa.

Ang igsuon sa biktima nga si Jerome Bastatas nga nakadungog og buto daling miadto sa kwarto sa biktima ug didto nakugang dihang nagkadugo na ang iyang igsuon hinungdan nga dali niyang gidala sa Minglanilla District Hospital.

Base sa nakuhang impormasyon ni Barde, hilabihan ka seloso ang bana sa biktima kay masuko kini kun dili makita ang asawa sa ilang balay.

Ang suspetsado midanguyngoy sa pag-atubang sa media ug mipadayag sa iyang pagmahay sa nabuhat ngadto sa iyang kapikas.

Ang pamilya sa babaye desididong mopasaka og kaso batok sa suspek. (Lesley Caminade-Vestil/EIM) (BANAT NEWS)