P1M nga pundo igahin sa matag konsehal sa Talisay

CEBU, Philippines - Mga konsehal sa dakbayan sa Talisay gikatakdang hatagan og P1milyon nga pork barrel sa bag-ong administrasyon.

Sa gipahigayong press conference kagahapon ang bag-ong napiling mayor nga si Johnny delos Reyes nagkanayon kini nga ang mga konsehal duolon kini sa mga opisyal sa barangay ug pangayoan og tabang alang sa ilang mga proyekto diha sa barangay. Sa maong sitwasyon kung walay budget gikan sa kagamhanan ang mga konsehal mapugos kini og kuot sa kaugalingon nilang bulsa apan ang uban maglisod gyud og hatag.

Gipasabot ni delos Reyes nga gawas niini tumong usab niya nga ang mga opisyal sa barangay kung dunay proyekto sama sa pagpatukod og poso dili na mahasol og anha sa iyang buhatan modirekta na lang kini ngadto sa mga konsehal.

Ang maong pundo kuhaon gikan sa intelligence fund sa mayor, apan giklaro ni delos Reyes nga ang mao niyang plano dili usa ka pamaagi aron motapon sa ilang kampo ang mayoriya sa konseho.

Giawhag niya ang mga sakop sa konseho nga magkahiusa na ug kalimtan ang pamolitika alang sa kaayohan sa Talisay.

Kahinumduman nga tulo lang ka konsehal ang kaalyado sa administrasyon karon nga sila si Danny Caballero, Val Ylanan ug Aldin Diaz kinsa pareho ubos sa landong sa Liberal Party.

Ang presiding officer nga si Bise Mayor Romeo Villarante ang kaalyado usab sa LP.  Sila si Konsehal Dennis Basillote, Edward Alesna, Richard Francis Aznar, Eduardo Gullas III, Antonio Bacaltos Jr., Socrates Fernandez, Dorotheo Emit nga kaalyado sa Alayon maoy majority bloc karon sa konseho.

Gawas sa mga konsehal, si delos Reyes nagplano usab kining mohatag og pork barrel sa mga kapitan sa barangay lakip na ngadto sa mga kagawad apan nagdepende pa kini sa budget sa siyudad. (/EIM) (BANAT NEWS)