Nailad sa “mo-check” sa blood pressure

CEBU, Philippines - Usa ka 86-anyos nga tiguwang babaye ang nawagtangan sa iyang alahas nga mobalor og P52 mil human siya giilad sa gidudahang mga sakop sa “Tiempo gang” sud sa iyang balay diha sa M.L Quezon sa brgy. Cabancalan dakbayan sa Mandaue niadtong Martes sa udto. Si Casuntingan chief, Senior Insp. Ramil Morpos miila sa biktima nga si Gennyrosa Ybañez kinsa nag-inusara lang sa ilang balay dihang giilad sa usa ka tawo nga nagpaila nga usa ka medical representative sa usa ka German company ug mopahigayon og libreng blood pressure (BP) check.

Niadtong Martes sa udto si Ybañez diha dapit sa gawas sa ilang balay dihang miabot ang mangingilad ug mitanyag og libreng blood pressure test ngadto kaniya nga mipapiyong kaniya sud sa lima ka minutos human ipahubo ang iyang mga alahas kay kuno makaapekto sa resulta sa BP. Apan sa iyang pagmata wala na diha ang lalaki lakip na iyang mga alahas.Matud pa dunay kauban ang lalaki diha sa gawas nga nagpaabot luwan sa usa ka motorsiklo ug daling miikyas palayo. (BANAT NEWS)