Mall security may lapso maong nasudlan sa kawatan

CEBU, Philippines - Dunay nakitang lapso sa seguridad ang mall sa barangay Tabunok sa dakbayan sa Talisay nga nasudlan og kawatan ug gani gituohan usab nga gipuy-an pa kini sud sa pipila ka adlaw.

Matud pa ni SPO1 Mikie Espina , imbestigador sa maong kaso nga usa sa ilang nabantayan mao ang instalasyon sa mga close-circuit television camera nga pulos lang nakatutok sa ‘selling area’ ug wala sa mga hilit nga bahin sa maong mall nga maoy posibleng sudlan sa mga dautang elemento.

Ang kapolisan miawhag sa tagdumala sa mall  nga i-review og tan-aw ang ilang na-record sa CCTV aron masusi kung duna bay dugang mga pagpangawat nga nahitabo nga gikalambigitan sa maong suspek.

Nailhan na hinuon ang lalaking nabulasot gikan sa kisame sa ikaduhang andana sa maong mall apan sa alyas lang kini nga Roland o Orland nga residente ra sa siyudad ug usa kini ka notadong kawatan.

Nagtuo ang kapolisan nga dugay na kining gibuhat sa suspek sa maong mall ug kung wala pa kini mabulasot sa kisame niadtong milabay’ng Lunes sa hapon dili kini masakpan.

Martes na sa hapon gihunong sa kapolisan ang pagpangita sa kawatan nga gituohang nakaikyas na nianang Martes sa kaadlawon pinaagi sa pagpadailos sa usa sa mga PVC pipes diha sa luyong bahin sa maong establisamento. (BANAT NEWS)