CH miisyu og tax declaration sa luna sa Compania Maritima

CEBU, Philippines - Ang Cebu City Hall miisyu na og tax declaration sa kayutaan nga nahimutangan sa karaang building sa Compania Maritima nga giangkon sa Cebu Port Authority ug nagpakita nga ang property iya kini sa City of Cebu ug dili sa CPA. Si Atty. Janeses “Jade” Ponce, executive assistant on legal matters ni Mayor Michael Rama, mibutyag nga wala na’y katungod ang CPA nga mangangkon nga sila ang tag-iya sa mao nga property.

Matud ni Ponce nga ang CPA wala gyuy dokumento nga mapakita nga sila maoy tag-iya sa yuta mao nga ang Cebu City Assessor’s Office miluwat og tax declaration sa maong property.

Wala dayon kakuhai og pamahayag ang kadagkoan sa CPA kabahin sa labing ulahi nga kalamboan sa isyu.

Si Ponce nagkanayon nga kadtong mga tawo nga mobabag-babag sama sa pagdili nga maka-parking ang sakyanan sa maong dapit ilang ipadakop.

Si Mayor Rama mitugyan niining maong isyu ngadto ni Atty. Ponce ug ni City Administrator Jose Marie Poblete, apil na ni City Attorney Gerone Castillo.

Wala malipay si Rama nga ang CPA mipatarok og koral palibot sa property nga ilang giangkon nga walay permit.

Apil gani nga gipatan-aw sa mayor ang pagkoral usab sa CPA sa Baclig Street, ang karsada nga nahimutang sa sulod sa port zone lumbay sa President Osmeña Avenue sa North Reclamation Area (NRA). (BANAT NEWS)