Unang benepisyaryo sa 4Ps tangtangon na sa Disyembre

CEBU, Philippines - Ang  unang  mga  benepisyaryo  sa Pangkabuhayan Pilipino Pantawid Program (4Ps) laksion  na gikan  sa listahan  unya  sa Disyembre  niining  tuiga.

Mao  kini  gibutyag  kagahapon  ni  Brigieda Doron, Cebu Provincial link  sa Department of Social Welfare and  Development (DSWD)7  atol  sa tulomanon  Kapihan  sa PIA.

Matud   pa  ni Doron  nga  ang  maong  programa  sa nasudnong  kagamhanan  gilusad  niadtong  tuig 2009    nga  mapupos  sulod    sa  lima  ka  tuig. Kini  pinaagi  sa paghatag  sa benepisyaryong  pamilya  nga    P1,000  matag  buwan.

Dinhi  sa lalawigan  sa Sugbo  mikabat  sa 2,554  ang  mga  benepisyaryo  sa unang  hut-ong  nga  mopahuway  na  karong  Disyembre.

Kini  tungod  kay  milampos  na  ang  ilang  mga anak  sa pag-eskuyla  ug  misaka  na  usab  ang  kahimtang  nila  sa pagpuyo.

Matud  pa  ni  Doron  nga  kining  maong  programa  sa panginabuhi  gitanyag   sa kagamhanan  ngadto  sa  mga  kabus  sa tinguha  nga  katabangan  ang  ilang  mga  anak  nga  makalampos  sa pag-eskuyla.

Sa  samang  higayon  gitanyagan  usab  sila  og  mga  pahuwam  aron  ikapamuhonan  nila  sa ginagmay  nilang  patigayon.

Gumikan  niini  si Doron  miingon  nga  kutob  sa  mga  banepisyaryo  sa  4Ps  nakatilaw  gyud  og  tabang  nga  binuwan  nga  nakahatag  kanila  og  kaluag  sa  panginabuhi.

Gituohan  usab  nila  nga  sa mosunod  nga administrasyon  ipadayon  gihapon  kini  aron  mokibra  ang  gidaghanon  sa mga  kabus  sa nasud. (BANAT NEWS)