2 ka bata nalumos samtang naligo sa dagat

CEBU, Philippines - Duha ka magsuon  kinsa   tinun-an sa Grade One ug Grade Two ang  nangalumos sa dagat samtang nangaligo  didto sa Sitio Lawis, barangay Luray-2, siyudad sa Toledo kagahapon sa alas 7:00 sa buntag.

Ang mga biktima mao sila si Jannylyn Montesclarus,10, tinun-an sa Grade-2 ug  ang manghod niini  nga si John Montesclarus, 9,  tinun-an usab sa Grade One, nga pulos nagpuyo sa maong lugar.

Si SPO4 Gil Lastimosa sa Toledo City Police   Station  mibutyag sa   Banat News   nga  si Lelit Montesclarus. inahan  sa  mga  biktima mibutyag  nga  sa  alas 6:00 pa  sa buntag nananghid kaniya   ang  mga  biktima nga mangaligo sa dagat kay mo-eskuwela kini pagkahuman.

Apan nianang mga alas 7:00 sa buntag usa ka mananagat ang nakadiskobri sa mga biktima nga naglutaw -lutaw   na sa dagat nga  wala nay panimuot hinungdan nga  gipahibawo dayon  niini  ang  mga molupyo sa maong lugar.

Daling  gisakwat  sa  mga  silingan  ang mga biktima ug gihatud dayon  ngadto  sa Toledo City District Hospital.

Apan   gideklarar sa mga doctor nga Dead on Arival (DOA) ang  duha.

Ang patay’ng lawas sa magsuon gitakdang   ipaubos sa autopsy aron masayran kun unsa gyuy hinungdan sa kamatayon niini ug   sutaon  kun wala bay foul play. (BANAT NEWS)