Mayor Sonny O. mipili kang Bastes hulip kang Biñas

CEBU, Philippines - Nagpili og bag-ong hepe sa kapolisan sa dakbayan sa Toledo si Mayor John Henry "Sonny" Osmeña sa unang adlaw sa iyang pag-asumer sa katungdanan niadtong Lunes.

Gipili ni Osmeña si Police Chief Insp. Michael Bastes nga kanhi nadestino sa Investigative and Detective Management Bureau sa dakbayan sa Mandaue.

Human sa flag raising atubangan sa bag-ong Toledo City Hall sa barangay Ilihan, gipahibawo ni Osmeña ang maong pahibalo ug nadawat kini dayon ni Bastes isip maoy hulip kang Supt. Henry Biñas kinsa gibalhin sa Mandaue City Police Office isip deputy director.

Si Osmeña nipili kang Bastes gumikan sa maayong nabuhat niini sa pagsanta sa ilegal nga drugas sa Sugbo.

Nunot niini ang labing unang gitahas ni Osmeña  kang Bastes mao ang paghimo sa dakbayan sa Toledo nga drug-free sulod sa 30 ka adlaw.

Tinguha ni Osmeña ang pagpaayo sa buhatan sa kapolisan ug paghatag og daghang patrol cars ug ubang kahimanan.

Diha-diha gihatagan si Bastes og sakyanan nga mao ang Ford Everest nga gigamit ni kanhi mayor Aurelio “Rudy” Espinosa.

Si Osmeña wala mogamit sa sakyanan sa mayor nga iya sa syudad sanglit ang personal niyang sakyanan ang iyang gamiton.  Nagtinguha usab si Osmeña pagbalhin sa buhatan sa kapolisan sulod sa MTCC compound nga bakantehan sa Agriculture Office kung haum ang maong plano.

Matud pa ni Osmeña nga ang buhatan sa agrikultura angayan ibutang duol sa mga mag-uuma sa kabukiran.  Si Osmeña adto mag-opisina sa iyang buhatan sa kanhi Traveller's Inn. (BANAT NEWS)