Kapitan sa Cogon-Pardo nanumpa kang Roxas

CEBU, Philippines - Ang bag-ong kapitan sa Barangay Cogon-Pardo nanumpa na sa katungdanan ngadto ni Secretary Manuel “Mar” Roxas sa Department of the Interior and Local Government (DILG).

Si Barangay Kapitan Harry Iran nga maoy numero uno nga konsehal sa Cogon-Pardo maoy mihulip sa gibiyaan nga pwesto ni Kapitan Eugenio Gabuya Jr. nga napili na nga konsehal sa dakbayan.

Giswerte si Iran kay didto g’yud siya nakapanumpa ni Roxas dungan sa pagpanumpa sa katungdanan sa 14 ka opisyal sa dakbayan sa Sugbo didto sa South Road Properties (SRP) kaniadtong Sabado.

Si Iran kaalyado ni Gabuya nga nahimo na karon nga dumadapig sa Bando Osmeña Pundok-Kauswagan (BOPK) mao nga nakadungan siya sa pagpanumpa atubangan ni Secretary Roxas.

Giawhag ni Roxas si Iran nga magtinarong sa serbisyo sa katawhan sa barangay Cogon-Pardo.

Samtang ang igsoong babaye sa gidudahang naghikog nga si Kapitan Rey Oybenes nanumpa na usab isip bag-ong konsehal sa Barangay Mabini hulip sa namatay niya nga maguwang.

 Ang mga konsehal sa Mabini nakahukom nga ang igsoon sa kapitan maoy ilang ihulip sa nabakante nga pwesto human nga ang numero uno nga konsehal mi-asumir usab nga kapitan puli ni Oybenes. (BANAT NEWS)