Kawatan mitago sa kisame sa mall

CEBU, Philippines - Naukay ang mga shoppers sa Gaisano Tabunok Department Store diha sa siyudad sa Talisay kalabot sa usa ka gidudahang kawatan nga diha na nagpuyo sa kisame sa maong tindahan.

Si SPO1 Mikie Espina kinsa usa sa mga miresponde sa hitabo mibutyag sa Banat News nga ang maong lalaki nabantayan dihang nabulasot ang tiil niini diha tumong sa usa ka tindahan og cosmetic products sa second floor nga bahin sa mall mga pasado alas 5:00 sa hapon niadtong Lunes.

Ang maong wala mailhing lalaki daling nakasibat human wala na igkita sa mga polis ug mga gwardiya nga misiksik sa mga kisame sa maong department store.

Sa second floor sa mall nahimutang ang mga tindahan og cellphone ug cellphone gadgets, cosmetics, mga beauty salon, optical store ug ayohanan og mga relo.

Gipaasohan pa ang kisame aron kini mogawas niadtong Lunes apan wala gihapon kini mogawas.

Nasuta sa imbestigasyon nga ang maong lalaki diha miagi pagsulod sa  kisame sa pansayan sa mga lalaki sa second floor ug gidudahang nakaikyas kini pinaagi sa pagkanaog agi sa dagkong PVC pipes sa luyong bahin sa maong edipisyo.

Ang maong kawatan nagbutang og higdaanan diha sa kisame ug gipangdala pa ang mga delata, junk foods ug tubig ug iyang mga sinina.

Nagtoo si Espina mosulod lang ang kawatan inig dayon na og sirado sa mall unya inig ka buntag inig dayon na og abli mogawas usab kini.

Gibutyag usab ni Espina nga nakita nila ang nawong sa maong lalaki diha sa Close Circuit Television (CCTV) sa tindahan ug duna na silay ideya kun asa kini pangitaon.

Ang maong lalaki magsul-ob kini og pormal nga sapot sama sa long sleeve polo aron dili mailhan ini og sulod sa mall ug kanaog.

 Ini’g kanaog usab niini gikan sa kesame pormal gihapon ang isul-ob niining sapot ug giingong ang mga kinawat niini ipangsuksok diha sa iyang sapot.(Brenda Batuto/EIM)

Kaso batok sa kanhi brgy.treasurer sa West  Poblacion sa Naga City gisaka na sa korte

Ni Mylen Manto

Nag-atubang og kasong malversation of public funds through falsification of commercial document ang kanhi barangay treasurer sa West Poblacion, Naga City, Cebu sa korte.

Ang graft investigation and prosecution officer II Pio Dargantes nagkanayon nga nakakita siya’g igong basihan aron ipasaka sa korte ang 34 counts of malversation batok kang Ma. Angelie Hamoy.

Matud niya ang akusado napakyas pag-file sa iyang counter-affidavit bisan pa man sa demand gikan sa piskalya.

Sa 34-counts nga malversation, si Dargantes way girekomendar nga piyansa alang sa siyam niini tungod sa kadako sa nalambigit nga nawalang kwarta ug ang 25 niini mahimo siyang makapiyansa og P738,000.

Ang Ombudsman-Visayas Public Assistance and Corruption Prevention Office (PACPO) maoy nagsilbing reklamante sa maong kaso.

Matud pa sa PACPO nga sila si Flora Misa ug Rolando Villarico, kanhi barangay konsehal sa maong barangay maoy mireklamo diha sa ilang buhatan.

Si Misa ug Villarico nagkanayon nga dunay anomalya sa disbursement of public funds sa ilang barangay ug gipasanginlan nila ang ilang kanhi kapitan nga si Pamela Sasan.

Apan niadtong Oktobre 18, 2005 mipasaka sad og kaso si Sasan ug nangayo og tabang sa Ombudsman nga ang iyang pirma nga napatik sa maong mga dokumento pulos gipeke sa mga  akusado.

Si State Auditor III Annabelle Arcadia Tantoy nagkanayon nga base sa iyang cash examination sa cash accounts sa akusado niadtong December 8, 2005 nagpakita nga dunay kakulangon nga P503,236.50 nga wala ma-account ang akusado gikan sa Enero 1, 2005 hangtud sa Disyembre 8 sa samang tuig.

Kini nagrepresenta sa mga issued checks nga walay supporting documents.

 Gipadad-an og demand ang akusado apan pakyas kini sa pag-settle sa maong kwarta. (BANAT NEWS)