5 ka kawani sa Hardware gipasakaa’g kasong pangawat

 CEBU, Philippines - Gipasaka na sa City prosecutors office ang kasong qualified thief batok sa lima ka mga kawani sa usa ka dakong hardware dinhi sa Sugbo  sa miaging  adlaw. Kini human namatud-i nga nagkasabot sila sa pagkuha sa electric wires nga mobalor og kapin sa usa ka milyon ka pesos gikan sa bulan sa Enero tuig 2010 hangtud sa Agusto 2012.

Ang gipasakaan og kaso mao ang magtiayong stock clerk sa Cebu Atlantic Hardware nga sila si Jason ug Joy Ann Laquinon, mga security guard nga sila si Dave Gueman Olayon ug Ryan dela Peña ug ang claim counter nga si Joy Barrientos Romero.

Sigun sa buhatan ni City Prosecutor Nicolas Sellon nga may igong ebidensiya ang prosecution sa pagduso sa maong kaso batok sa mga akusado subay usab sa pagkasikop ni Jason Laquinon atol sa entrapment operation sa CIDG. Si City prosecutor II Mario Ley Gidayawan nagkanayon nga lig-on kaayo ang ebidensya sa prosecution dihang mikompisal ug miangkon ang akusado nga si Jason Laquinon ug David Olayon nga giubanan sa ilang mga abogado.

Gawas  niini, ang sinumpaang pamahayag sa mga testigos nga sila si Jory Ramos, Ralph Anthony Roque ug Glen Dinla kinsa miingon nga nagkunsabo gyud ang nahisgutang akusado aron mapagawas sa maong  hardware ang mga Unicon Standed Philflex electric wires.

Laing gibasehan ning maong  desisyon ang summary of loss sa audit report ni Ronald Anthony Acuyado, ang audit staff sa Atlantic Hardware nga ang nahanaw nga mga electrical wires gikan sa tuig 2010 hangtud sa 2012 mikabat sa P1,159,589.42.

Unang miduso og motion for reconsideration ang mga akusado nga nagpasabot nga wala nila abusohi ang pagsalig sa kompaniya nga ilang gitrabahoan ug mikwestyon sa regularidad sa entrapment operation sa CIDG.

Ang city prosecutors office wala morekomendar og piyansa alang sa temporaryong kagawasan sa mga akusado tungod sa kadako sa kantidad nga nakuha niini.  (BANAT NEWS)