Maguwang giluba angol sa manghud

CEBU, Philippines - Naangol ang 33 anyos nga mag-uuma human kini dunggaba pag-unay   sa burokinto niyang manghud nga hubog didto sa barangay Gaang, sa lungsod sa Tuburan niadtong Domingo sa alas 3:30 sa hapon.

Ang biktima mao si Fedirico Dakay, 33, minyo, nagpuyo sa maong lugar ug usa ka mag-uuma.

Samtang ang suspek mao ang iyang manghud nga si Francisco Dakay Jr., 25, minyo ug nagpuyo  usab sa maong dapit.

Si PO1 Ariel Maravillas saTuburan Police Station mibutyag  sa Banat News  nga ang biktima ug ang suspek kauban ang ilang mga silingan, nag-inom sa sayo  pa.

Apan dihang nahubog na ang biktima nagpahibawo sa iyang maguwang nga naglagot siya sa ilang silingan nga wala makuha ang ngalan ug nananghid nga iya kining dunggabon.

Ang biktima mibadlong sa suspek ug giingnan  nga   dili maghinubog,  busa  mikalma ang suspek ug nag-una sa  pagpauli  sa balay niini.

Ang  biktima  wala  makamatikod   nga nagdumot  kaniya ang  suspek,  miapas kini ug  dihang iyang  naapsan, kalit  siyang  giluba  niini  sa buko-buko. Giusban  siya  og  luba  apan  iyang  nasagang  busa  midagan  ang  suspetsado  pahilayo  sa maong  lugar.

Ang biktima gihatud  dayon  ngadto  sa  Tuburan District Hospital, samtang ang suspek nadakpan sa mga tanod sa barangay ug gitugyan na karon sa kapulisan.

Ang suspek gihulagway kini nga badlongon ug daghang higayon na kini gireklamo sa barangay.  (BANAT NEWS)