Drayber naligsan sa trak patay

CEBU, Philippines - Usa ka drayber sa motorsiklo ang naligsan patay  sa nagsunod nga trak de karga dihang giingong kalit nga misaliring ang motor diha sa barangay Sabang sa lungsod sa Sibonga niadtong Domingo sa hapon.

Ang biktima nga patay nang nadangat sa tambalanan mao si Nicolas Kong,44, nagpuyo sa Sityo Gahad sa Poblacion Sibonga. Samtang ang drayber sa Isuzu cargo truck nga kargado og mga softdrinks mao si Danilo Davide,39, giingong paryente ni Gov. Hilario Davide III nga nagpuyo sa Colawin, lungsod sa Argao.

Matud ni SPO3 Zacarias Cabaluna sa Sibonga Police dihang nahinabi sa Banat News nagmaneho sa iyang chappy nga motorsiklo gikan sa siyudad sa Carcar ug paingon na untang mopauli ang biktima. Apan samtang nagdagan ang motor, kalit lang kining misaliring sa dalan, gituohang dunay problema sa preno ang motor ug misampid sa gisundang cargo truck nga hinay nga nagpadagan.

Tungod niini natumba ang motor ug nalamba  dapit sa ligid sa cargo truck ug naligsan. Patay na kini pag-abot sa Carcar City District Hospital. Ang drayber sa trak mitahan dayon sa kapolisan. (BANAT NEWS)