Milayat naugbok sa kanal patay

  CEBU, Philippines - Duha ka lalaking gituohang desperado na sa kinabuhi ang naghikog, usa kanila piniriso sa Punta Princesa Police Station sa Cebu City tungod sa kasong rape, samtang ang usa milayat gikan sa second floor sa ilang balay.

Nagbitay nang napalgan ang usa ka piniriso human kini maghikot sa iyang kaugalingon ginamit ang liston pasado alas-12 sa tungang gabii diha sa karsel sa Punta Princesa Police Station.

Ang naghikog nailhan nga si Leopoldo Ragasajo Navarro, 49, usa ka plumber ug molupyo sa Purok Tres sa barangay Tisa.

Ang duty nga police niadtong higayona nga si PO1 Necio Torreon Jr. mi-roving sa karsel aron pagsusi sa duha nila ka dinakpan, apan ang kauban ni Navarro sa selda nga si Rolando Aligame ra maoy iyang nakit-ang naghigda sa salog.

Hinungdan nga iyaha kining gipukaw ug gipasusi ang kasilyas kung atoa ba didto si Navarro apan didto nagbitay na ug wala nay kinabuhi ang gipangitang inmate.

Daling gibadbad ang liston diha sa liog niini ug gitabang sa Emergency Rescue Unit Foundation apan patay na gyud kini.

Matud pa nga daan nang mibahad si Navarro nga maghikog tungod sa maong kaso.

Samtang pasado alas- 5 kagahapon sa buntag diha sa dalan E. Sabellano barangay Quiot usa usab ka lalaking adunay gihambing sakit ang mi-ambak gikan sa ilang balay nga miresulta sa iyang kamatayon.

Ang namatay mao si Nemesio Tortuga Cajes Jr., 45, molupyo sa maong lugar, giingong adunay gihambing sakit. Sa imbestigasyon sa Homicide Section, uwahing nakit-ang buhi si Cajes nga nagpasopaso pa sa gawas nga bahin sa ilang panimalay apan sunod na lang nga nakita mao ang pagkahagsa niini sa kanal.

Sumala pa nga naugbok ang nawong ni Cajes diha sa kanal ug gituohang  milayat kini gikan sa ibabaw nga bahin sa ilang balay. Gisuwayan pa unta kini paghatag og first aid sa mga Emergency Medical Service  apan nagusbat na gyud ang ulo niini.

Matud pa sa igsuon ni Cajes nga si Juanita ngadto sa kapolisan nga niadtong bulan sa Agosto sa miaging tuig milayat usab  ang iyang igsuon gikan sa second floor sa ilang panimalay apan nasalbar ra. (BANAT NEWS)