Dalagita nadakpang may shotgun

CEBU, Philippines - Usa ka 16 anyos nga dalagita kinsa suspetsado nga  sakop  sa  Crips gang ang nasikop  nga nagdala  og  pugakhang didto  sa barangay  Maguikay, dakbayan  sa Mandaue lapas na sa tungang gabii niadtong  Sabado.

Ang nahisgutang  batan-on   nakig-inom  sa  iyang  mga  kaubang  lalaki  dala  ang  iyang  pugakhang didto  sa usa  ka  gasoline  station  sa Maguikay.

Si Casuntingan Police Chief nga si  Sr.Insp Ramil Morpos nagkanayon nga samtang sila mipahigayon og hot pursuit operation alang sa mga suspetsado nga mi-ambush patay sa usa ka Koreano niadtong Sabado sa gabii, miduol  kanila ang  usa ka  concerned citizen ug mi-report  bahin  sa dalagita  nga  nagdala  og  improvised shotgun.

Sa  ilang  pag-abot  didto sa maong  lugar  nakita  ni  Morpos  ang  dalagita  nga  midagan  paingon  sa comfort  room  sa gasolinahan diin  didto  tagoi  niini  ang  iyang backpack.

Apan  dihang  girikisa kini  sa kapolisan  nakuha gayud ang maong shotgun nga adunay 12   ka  buhi  nga  mga  bala.

Tungod kay  mibalibad  kini  nga  dili  iyaha  ang maong  armas, padayon  pa karong giimbistigar  sa kapolisan  ang maong  kaso. Kasamtangang gibalhog ang maong dalagita sa  Subangdaku police station samtang gihikay pa ang kasong illegal possession of firearms nga ipasaka batok kaniya.  (BANAT NEWS)