Mga LP nga konsehal hataga’g chairmanship sa komite

CEBU, Philippines - Ang  mga konsehal nga kaalyado sa Liberal Party sa konseho sa dakbayan sa Talisay gitakda nga pahupton og mga committee chairmanship, matud ni Vice Mayor-elect Romeo Villarante.

Si Konsehal Aldin Diaz kinsa Bachelor of Science in Accountancy   maoy pahupton sa committee on finance, si Val Ylanan kinsa usa ka engineer maoy pahupton sa committee on infrastructure ug Danny Caballero ang itudlong chairman sa committee on peace and order.

Gipasabot ni Villarante nga purely legislative ang tumong sa paghupot unya ni Caballero sa komitiba aron adunay mga balaod nga mapanday nga makahatag og kalamboan sa siyudad ug tabang usab ngadto sa kapolisan.

Apan wala pa mohisgot si Villarante kung unsay mga komitiba nga ipahupot sa kaalyado sa Alayon.

Hinuon si Villarante nanghinaot nga ang majority sa konseho nga gilangkuban sa Alayon mohatag og koordinasyon ngadto sa bag-ong administrasyon.

 Sa laing bahin, Si Caballero nga nahinabi sa mga tigbalita nagkanayon nga mapasalamaton siyang pahupton sa maong komitiba ug misaad kining maningkamot nga makahatag og kalamboan.

Matud ni Caballero nga usa sa iyang tutokan mao nga mahatagan og pagtagad ang mga panginahanglon sa kapolisan sama sa sakyanan, handheld radio ug uban pang mga ekipo.

Tumong usab ni Caballero nga mahimong labing epektibo ang kapolisan sa siyudad sa pagmentinar sa kahusay ug kalinaw.  WC (BANAT NEWS)