Majority bloc sa konseho sa Talisay di obstructionist

CEBU, Philippines - Ang mga membro sa majority bloc sa konseho sa dakbayan sa Talisay dili “obstructionist” sa bag-ong administrasyon matud ni Talisay City councilor Richard Francis “Choy” Aznar.

May  tulo  ka mga konsehal nga ubos sa Liberal Party nga mao sila si Danny Caballero, Val Ylanan ug Aldin Diaz ang napili sa milabay’ng eleksiyon ug pito ka mga sakop sa Alayon nga sila si Aznar, Antonio Bacaltos Jr., Dorotheo Emit, outgoing mayor ug councilor-elect Socrates Fernandez, Eduardo Gullas III, Edward Alesna ug Dennis Basillote.

Samtang ang umaabot nga presiding officer mao si Vice Mayor-elect Romeo Villarante kinsa kaalyado usab sa LP.

Si Aznar nga nahinabi sa mga tigbalita nagkanayon nga dili sila mahimong obstructionist o mobabag sa mga kaayohan nga buhaton sa mga sakop sa minority.

Matud niya nga sa milabay’ng mga adlaw gipatawag sila sa bag-ong napiling mayor nga si Johnny Delos Reyes ug giklaro nila nga dili sila mobabag  unsa  may  gusto  sa minoridad  alang  sa kaayohan  sa kadagahan.

Giklaro ni Aznar nga ang majority andam   nga  motabang sa mga programa sa bag-ong napiling mayor kung makita nilang makaayo kini sa Talisaynon.

Apan kung adunay dili nila  masabtan  sa mga proyekto o mga balaod nga ipalabang sa minority ila usab kining sukiton.

Matud usab ni Aznar nga buot sa grupo nga makigtinabangay sa minority alang sa kalamboan.

Sa laing bahin, si Villarante nagkanayon  nga ang mga konsehal nga ubos sa majority gihatagan lang una kini og tag-lima ka quota sa JO.

 Matud ni Villarante nga karong buwan sa Hulyo basin mapun-an ang maong quota sa majority councilors apan nag-agad  kini sa ilang kooperasyon sa bag-ong administrasyon.

 Ang mga sakop sa ning umaabot  nga administrasyon kaniadto gihatagan  usab  og lima ka  quota sa  mopahuway  na  nga administrasyon. WC (BANAT NEWS)