Taga South Korea mitukod og pansayan sa Labogon

CEBU, Philippines - Gilangkoban sa 42 ka boluntaryo nga mga langyaw nga mga tinun-an nga babaye sa  Ansan University sa South Korea ang nagtinabangay sa pagtukod og community toilet sa barangay Labogon, dakbayan sa Mandaue nga kapahimuslan sa mokabat 200 ka mga molupyo niini.

Ang maong mga langyaw nga mga Korean national  mga tinun-an sa kursong nursing, computer technology, architecture ug physical therapy.

Ang  ilang paghimo sa maong pansayan   maoy  kabahin sa ilang proyekto sa komunidad nga  molungtad lamang og upat ka adlaw. Si Han Seong Taek nga maoy Dean of student Welfare sa Ansan University   mibutyag ngadto sa mga tigbalita  nga  ilang  boluntrayo nga pag-ugmad og pansayan alang sa publiko.

Alang  kanila   mao  kini  ang   nagsilbing kabahin sa ilang volunteer-mission.

Gitataw niya nga ikaduha na nga higayon ang ilang pagbisita sa barangay Labogon sa dakbayan sa Mandaue  sa ilang volunteer-mission.

Ang  una nilang gihimo kaniadto mao ang pagtabang sa pagbahig sa basura.

Dugang nilang gihimo mao ang pagpamintal sa mga lawak saringan sa Labogon National High School ug gitudloan usab nila ang mga tinun-an sa Korean language.

Si Labogon Barangay Kapitan Damaso Tumulak nga nahinabi sa mga tigbalita miingon nga napili ang ilang dapit nga butangan sa maong proyekto sa maong mga langyaw pinaagi   sa usa ka travel agency.

Matud pa ni Tumulak nga 20,000 ka molupyo sa ilang dapit  diin  kadaghanan  wala magbaton og  pansayan.

Kini   maoy hinungdan nga ilang gihangop ang kaugmaran sa communal toilet sa ilang dapit, sumala  ni  Tumulak. WC (BANAT NEWS)