Nagselos, kapuyo gipusil dayon naghikog

CEBU, Philippines - Maayong pagkabuslot sa dughan sa usa ka panadero  samtang nabuslot usab ang ulo sa iyang kapuyo human kini niya gipusil usa pa nagpusil sa iyang kaugalingon pasado alas-10 sa miaging gabii diha sa sitio Ipil-Ipil Capitol Site dakbayan sa  Sugbo.

Ang namatay nailhan nga si Benjie Singgote, 24,  lumad nga molupyo sa lungsod sa Daanbantayan ug usa ka baker sa San Jose Bakeshop samtang ang kapuyo niining anaa sa kritikal nga kahimtang mao si Cecile Oliveros, 22, usa usab ka staff sa tindahan.

Sa nasayran, unang alarma nga nadawat sa kapolisan mao nga adunay nahitabong indiscriminate firing sa sud sa usa ka boarding house maong nanawag og polis ang tag-iya.

Ang mga sakop sa Special Weapons and Tactics daling miresponde sa dapit apan  sa ilang pagpugos og abli sa lawak sa managpuyo naabtan nalang nilang naglunang na sa kaugalingong dugo ang duha nga nagtapad.

Si Oliveros giingong nagtinga pa hinungdan nga dali kining gidala sa Cebu City Medical Center ug giingong anaa kini sa makuyaw nga kahimtang.

Matud pa sa landlady sa duha nga si Teny Alboradura nga sa wala pa mahitabo ang pagpamusil, iyang nadunggan si Oliveros miingon nga "Di lagi taka buwagan dong!" human niini usa ka lanog sa buto sa armas ang ilang nadunggan.

Samtang ang silingan sa magpuyo nga si Anecito Dalida mipadayag usab nga sukad nga nangabang ang duha sa maong boarding house wala gyud sila makadungog nga nag-away ang duha.

Sa pakighinabi sa Banat News ni PO1 Rooful Adalim, sa Homicide Section mipadayag kini nga ila pang sutaon kun unsa gyud ang na-ingnan sa duha nga misangko man sa pagpamusil ni Singgote ngadto sa iyang kapuyo.

Matud pa ni Adalim nga usa sa ilang gitutukang hinungdan mao ang pangabubho.

Dako ang pagtuo sa kapolisan nga unang gipusil ni Singgote ang iyang kapuyo nga si Oliveros dayon nagpusil kini sa iyang kaugalingon.

Matud ni Adalim  tumong gyud sa kasing-kasing ang samad pinusilan ni Singgote.

Samtang hangtod sa pagsuwat ning balita, padayun pang gikontak sa Homicide Section ang mga tagtungod sa duha ug kasamtangan usab nga nagkigbisog si Oliveros sa iyang kinabuhi human makaangkon og samad pinusilan sa iyang ulo.

Nakuha sa crime scene mao ang lima ka buhing bala sa kalibre .22 diin lakip usab nga narekober ang armas nga gigamit. EIM (BANAT NEWS)