Rerouting atol sa oathtaking sa team Rama

CEBU, Philippines - Sirad-an ang pipila ka mga karsada alang sa oathtaking sa Team Rama nga panguluhan ni Bise Presidente Jejomar Binay karong adlawa nga pagahimuon diha sa Plaza Independencia.

Sugod sa alas 9 sa buntag, dili maagian sa mga motorista ang M.J. Cuenco Avenue, Osmeña Boulevard, M.C. Briones Street, Legaspi Extension ug Serging Osmeña Boulevard.

Manumpa alang sa ilang bag-ong termino sila si reelected Cebu City Mayor Michael Rama, Vice Mayor-elect Edgardo Labella ug Councilors-elect Mary Ann de los Santos, Dave Tumulak, James Cuenco ug Hans Abella kinsa nakadaug sa miaging May 13 nga piniliay.

Sigon sa traffic rerouting plan nga giandam sa City Traffic Operations Management (CITOM), adto paagion ang mga sakyanan sa Cebu South Coastal Road pinaagi sa tunnel.

Kadtong gikan sa Carbon, kinahanglang moliko sa Lapulapu sa walang bahin paingon sa ilang destinasyon.

Tungod kay dili pa una paagian ang Plaza Independencia area mamahimong muagi sa M.J. Cuenco dayong liko sa V. Sotto Street sa gusto moadto sa pier area.

Ang jeepney nga dunay biyaheng 08E, 12G, 12I and 12 J paingon sa  North Reclamation Area pinaagi sa Urdaneta St. moliko sa wala didto sa M.J. Cuenco dayong liko sa tuo ngadto sa T. Padilla St. dayon wala paingon sa Benedicto St., liko na usab sa Gen. Maxilom Ave., paingon sa Andres Soriano Ave., dayon na sa North Bus Terminal.

Ang rotang 08F nga moagi sa M.C. Briones kinahanglang moliko sa Lapulapu Street, dayong liko sa tuo sa Urdaneta St., moliko pag-usab sa M.J. Cuenco Avenue ngadto na sa naandan nga ruta.

Ang paingon sa Mandaue City moliko sa M.J. Cuenco ug mosunod na sa naandan nga ruta.

Ang byaheng 02A, 02B ug  02E paingon sa pier area agi sa M.C. Briones St. muliko sa Lapu-Lapu St., liko sa tuo paingon sa Urdaneta St. dayon lahos sa M.J. Cuenco Ave., ug moliko na usab ngadto na sa Arellano Blvd.

Samtang ang rotang 12E, 12G, 12I ug 12J gikan sa North Reclamation Area adto moagi sa Serging Osmeña Blvd. moliko sa tuo paingon sa V. Sotto St., dayong liko sa wala ngadto sa M.J. Cuenco Ave. paingon na sa naandan nga dalan.

Gipahimangnoan ang mga motorista sa pagsunod sa mga signages nga ipamutang karong adlawa sa mga kadalanan.  (BANAT NEWS)