Brgy. T. Padilla mogamit na og solar energy
CEBU, Philippines - Mga miyembro sa konseho sa Barangay T. Padilla, gusto nang mogamit og renewable energy inay magsige og bayad og bill sa kuryente kada buwan. Si barangay kapitan Michael Ralota mibutyag nga duna silay plano nga magpataud og mga solar panels sa tibuok barangay hall.
Kung mataod na kini, makaminus ang barangay og kapin P100,000 nga bayrunon sa kuryente kada tuig.
Apan giangkon niini nga dako ang gikinahanglan nilang budget alang sa pag-instalar niini. Hinuon gipasalig niyang mabawi ra ang gasto sulod sa lima ka tuig.
“Aron mi katipid, ako ni ipatuman,†matud pa ni Ralota.
Mokabat og P8 milyones ang gastuonon niini nga proyekto nga kuhaon sa Local Development Fund kon LDF ni Ralota nga unta maoy ipamalit og sakyanan sa kapitan ug sa mga konsehal.
“We will be the first barangay that has an innovation like this,†pasiatab pa ni Ralota.
Nagsugod ang ideya sa Barangay T. Padilla dihang nakatambong og mga seminar kabahin sa bentaha sa paggamit og solar energy kun itandi sa naandan. Bisan kon mag-ulan duna gihapoy enerhiya gumikan sa battery bank sa solar panel.
Dugang plano ni Ralota mao ang pagbutang unya og 18 ka CCTV camera sa tibuok barangay aron ma-monitor ang seguridad sa lugar. Ang maong kuha sa camera makita sa mismong website sa barangay. Ipatuman ang proyekto karong Oktubre. (BANAT NEWS)
- Latest
