Mga barko gidid-an pagbiyahe; 3 mil ka pasahero na-stranded

CEBU, Philippines - Tungod sa kabati sa panahon, gikanselar ang mga biyahe sa mga sakyanang pangdagat ug wala tuguting makalayag tungod sa bagyong Gorio nga miigo na sa pipila ka bahin sa Mindanao ug Northern-Cebu.

Gatosang mga pasahero karon ang na-stranded sa nagkadaiyang mga pantalan sa mga dapit nga agian sa bagyong Gorio nunot sa pagdili sa Coast Guard sa mga barko nga makabiyahe.

Si Cebu Coast Guard assistant Station Commander Cecille Romero mipadayag sa Banat News nga adunay di mominos 17 ka mga sakyanang pangdagat ang kasamtangang nakanselar tungod sa bagyong Gorio.

Matud pa ni Romero nga mga biyahi nga gikan diri sa Cebu nga nakanselar mao ang biyahi nga patubang sa Surigao; Calbayog, Leyte; Hilongos, Leyte; Baybay, Leyte; Ormoc City, Leyte; Bato, Leyte; sa Manila ug Negros Oriental.

Samtang gikan sa Hagnaya kanselado usab ang mga biyahe patubang sa Caoayan ug Cataingan, Masbate.

Si Romero midugang nga wala pa silay nadawat nga mga report nga dunay naaberya sa kadagatan. Niadto pang Biyernes sa udto ilaha nang gipangkanselar ang ubang biyahe hangtod kagahapong adlawa. Padayag usab ni Romero nga padayun sila karun nga nag-monitor sa ubang lugar posibling moigo ang bagyong Gorio.

Si Romero miingon nga subay sa bag-ong safety measures, bisan unsa ka hinay nga signal storm warning sa mga dapit nga maagian o destinasyon sa mga barko, gamay man o dako awtomatikong kanselado ang mga biyahe.

Dugang pa ni Romero nga hangtod nga dili mohatag og go signal ang Philippine Atmospheric Geophysical and Astronomical Service Administration pag-lift sa storm warning signal dili nila tugutang makabiyahe ang mga barko. Moabot sa 2,922 ka mga pasahero ang na-stranded sa nagkadaiyang mga pantalan sa Sugbo kagahapon tungod sa pagkanselar sa mga byahe sa barko tungod sa bagyong "Gorio".

Matud pa ni Romero ang maong mga pasahero anaa pa karon sa Pier 1, 2, 3, 4, 5 sa Cebu City ug sa pantalan sa Bantayan ug Hagnaya. ( Lesley Caminade –Vestil, Brenda Batuto ug Marigold P. Lebumfacil/EIM)  (BANAT NEWS)