Koreano gi-ambush patay

CEBU, Philippines - Usa ka Koreano kuyog sa iyang Filipino nga driver ang gibanhigan patay pasado alas-3 kagahapon sa hapon diha sa may A.S Fortuna Street sa dakbayan sa Mandaue.

Si Yi Sung Jung, buwag sa asawa nga taga Su Won City, South Korea ang luwan sa usa ka SUV nga adunay plakang ZLC 546 kuyog sa iyang drayber nga si Sonny Ubal, 42, taga B.Roriguez dakbayan sa Sugbu atol sa ambush.

Si Yi nakabaton og mga samad pinusilan sa nagkadaiyang parte sa iyang kalawasan  nga maoy hinungdan sa iyang hinanaling kamatayon samtang naigo sa tuong kamot si Ubal.

Matud pa ni Casuntingan Police chief P Sr./Insp. Ramil Morpos base sa pamahayag ni Ubal,  ang mga mi-ambush kanila mao ang duha ka lalaking luwan sa usa ka Honda XRM nga motorsiklo, apan wala niya maklaro ang kolor ug plaka sa motor tungod kay “heavily tinted” ang ilang gisakyan.

Si Morpos nagkanayon nga base sa ilang imbestigasyon, ang biktima gikan sa usa ka coffee shop sa A.S Fortuna diin kauban niining nangape ang laing upat ka mga Koreano kagahapon.

Apan sa ilang pagbiya pasado alas-3 ug pag-abot sa  nahitaboan kalit lamang nga nakadungog ang drayber ug tulo ka mga buto sa pusil ug nakit-an na niya ang iyang amo nga nagkadugo dayon miambak sa sakyanan.

Tungod niini hasta siya miambak gawas sa sakyanan ug ang ilang sakyanan mibangga sa railings sa “Joven’s Grill.”

Dugang pa ni Morpos nga nagpasad usab sa crime scene ang daghang basiyo sa kalibre.45 ug nakuha usab nila ang bag sa Koreano nga dihang ilang giukay adunay nakuhang gidudahang mga shabu, marijuana  ug  nubain ampules.

Ang duha gidala sa Gullas Hospital apan gideklara nga dead on arrival si Yi.

Sa pagkakaron anaa na usab sa kamot sa kapolisan ang cellphone sa biktima ug sa drayber niini aron mapaubos sa “technical examination” ug masuta usab kun unsay motibo sa pagpamanhig.

Gikatakdang ipailawom pa usab sa laboratory test ang mga nakuhang gidudahang  illegal nga drugas gikan sa bag ni Yi.

Si Yi tulo na ka tuig nga nagpuyo dinhi sa Sugbu ug nag- negosyo og surplus nga mga sakyanan. (BANAT NEWS)