Pamilyang Ducayag mipasaka’g kasong sibil
CEBU, Philippines - Gipasakaan og kasong civil kagahapon sila si Mauricio Doblados Jr., Jeffrey Aquino, Melvin Boyles ug ang Viscal Development Corporation sa inahan sa usa ka tinun-ang namatay sud sa usa ka dakong mall sa dalan Colon ning siyudad sa Sugbu.
Si Fe Soledad Ducayag, inahan sa biktimang si Mario Alfie Ducayag mikiha og apil sa Viscal Development Corporation nga maoy tag-iya sa Metro Gaisano-Colon.
Si Mario Alfie napasanginlang nag-shoplift og sandals sa maong tindahan niadtong Abril 12, 2013 apan namatay tungod sa giingong pagkulata kaniya sa mga gwardiya sa maong mall, base sa migawas nga imbestigasyon sa National Bureau of Investigation-7.
Ang pamilyang Ducayag nangayo og P19.5 million nga damages.
Si Atty. Wendell Quiban mitug-an sa media nga bisan pa man duna nay criminal complaint nga gipasaka batok nila ni Doblados, Aquino ug Boyles sila mahimo pang kasohan og civil.
Base sa imbestigasyon sa NBI-7 migawas nga dunay kalambigitan sila si Doblados, Aquino ug Boyles.
Si Cerwin Eviota, tigpamaba sa Metro Colon mibutyag sa Banat News nga ilang tubagon ang mga pasangil. Ug ila kining tubagon once makadawat sila’g summon gikan sa korte.(/EIM) (BANAT NEWS)
- Latest
