Mga batan-on giumol alang sa pagka-maayong lider

CEBU, Philippines - Sa tinguha nga matabangan ang mga kabatan-onan nga wa  na magtungha, ang Department of Social Welfare and Development (DSWD-7) nakig-alayon sa Armed Forces of the Philippines (AFP) Central Command sa pag-umol og dugang  programa sa panginabuhi  nga  may labot sa kapabilidad kung unsaon nga mahimong maayong lider  ug mahimong produktibong indibidwal sa umaabot.

Matud pa ni Kerwin Macopia sa DSWD 7 nga ning bag-ohay lang adunay 16 ka youth leaders ang misalmot sa 1st Island Chapter Planning Workshop nga dungan nga gipahigayon sa Youth for Peace Philippines-Visayas, Local Government Units, AFP ug usab DSWD-7 diin ang mga misalmot nga naglangkob sa organisasyon sa Youth for Peace nagagikan sa nagkalain-laing isla sa rehiyon sa Kabisay-an.

Gipadayag ni Macopia nga ang maong tulo ka adlaw nga Planning Workshop nakahatag sa mga batan-on og dugang kaalam  unsaon pagdasig sa kaubanan nilang mga  kabataan nga mahimong aktibo sa mga aktibidad sa komunidad.

Dugang pa niya nga ang nagkalain-laing aktibidad sa maong workshop nagtudlo sa mga kabataan sa pagkaresponsabli ug usab pagsalmot sa mga produktibong aktibidad kay sa moapil sa mga daotang  bisyo  o  aktibidad nga maoy magtukmod  kanila sa kagubot. Sa maong okasyon misalmot usab ang duha ka mga youth-awardee nga organisasyon sa Sugbo nga naglangkob sa Pag-asa Youth Association (PYA- Talisay Chapter) ug usab  CIT Industrial Engineering Council (CIT-IEC) diin kining maong mga organisasyon nahimong mananaog sa  TAYO (Ten Accomplished Youth Organizations).

Ang mga representante gikan sa DSWD ug Department of Interior and Local Government (DILG) mitambong usab aron mopahibalo sa mga batan-on sa mga programa ug serbisyo niini.

Samtang si Jaybee Binghay, Regional Information Officer (RIO) sa DSWD-7 mipahayag sa kamahinungdanon sa pagka maayong lider  alang sa  mga  batan-on.

Gibutyag niya nga pinaagi sa pagdasig ug usab determinasyon sa mga organizers, ang  Youth for Peace Philippines nagpaabot   pa og dugang mga lider sa  kabataan  gikan sa ubang munisipalidad aron mosalmot  sa sunod nga planning workshop sa rehiyon sa Kabisay-an. (/WC) (BANAT NEWS)