“Maoy” nga nanuok sa silingan gipusil sa ulo patay

CEBU, Philippines - Patay ang usa ka mag-uuma nga giingong nagmaoy kun mahubog human kini gipusil sa ulo sa silingang iyang gikainom diha sa barangay Cagay sa lungsod sa Sibonga niadtong Miyerkules sa alas 9:30 sa buntag.

Ang biktima mao si Vincent Rupeta, 29, nagpuyo sa maong lugar samtang giila ang suspek nga mao si Ronald Sejesmundo alyas Baloryo, 31. Matud ni SPO1 Jaime Mendoza sa Sibonga Police dihang nahinabi sa Banat News nag-inom pa ang duha ug nagkuyog sa ilang pagpamauli apan giingong kalit nga nisugmak ang pagkamaoy sa biktima ug gituok ang suspek.

Ang suspek daling mibunot sa iyang armas ug gidul-itan pagpusil ang ulo sa biktima nga nakaingon sa kamatayon niini.

Ang suspek mitahan sa iyang kaugalingon dihang nangabot ang kapolisan. (/EIM) (BANAT NEWS)