3 Cebuano PNPA cadets mireklamo
CEBU, Philippines - Tulo ka mga Sugbuanong kadete sa Philippine National Police Academy (PNPA) ang mipasaka og kasong sibil batok sa mga opisyal sa PNPA tungod sa gihulagway nilang illegal nga pag-dismiss kanila.
Sila mipasangil nga pugsanon silang gipapirma og resignation letter nga sila mi-quit na sa PNPA ug dili na sila mopadayon sa ilang pagtungha.
Atubangan sa piskalya, gipasaka nila ni Venus Acedillo, Christopher Ruiz Jr. ug Kerbee Torrefiel ang reklamo aron makapangayo og tabang sa korte nga ipawalay-bili ang resignation letter nga gipapirmahan kanila ug aron mandoan ang kadagkoan sa PNPA nga dawaton sila pag-usab sa PNPA Class 2017.
Ang mga gipasakaan og reklamo mao sila si PNPA Director Police Chief Superintendent Noel Constantino; ang officer-in-charge PNPA cadets nga si Police Superintendent Hordan Pacatiw ug ang usa ka giila lang nga si cadet 2nd class Bacay, nga pulos nadestino sa PNPA, Camp Gen. Mariano N. Castaneda, Silang Cavite.
Ang mga kadete mialegar nga nakapasar sila sa unang pagsuway atol sa pagsulod nila didto apan sa ikaduhang challenge giingong nangaluya sila ug nag-dehydrate.
Apan nahibulong sila nga gibitad sila padung palayo sa ilang mga classmates aron ipa-medical checkup ug pagkahuman gidala sa ACAD building ug didto giingong gipugos sila pagpirma sa usa ka dokumento nga ilang nadiskubrehang resignation letter diay. Nabalaka silang dili sila makaapil sa pagbukas sa klase karong Hulyo 6, 2013 maong nangayo og tabang sa korte aron mopagawas og mandamus ngadto sa PNPA.
Dugang pa niini, buot nilang mangayo og danyos nga dili mominus P500,000 tungod sa kahasol ug danyos perwisyos nga ilang nadawat. (BANAT NEWS)
- Latest
