Oliva Miasumir Isip provincial treasurer

CEBU, Philippines - Miasumir na kagahapon isip Officer-in-charge sa Provincial Treasurer’s office ang kanhi Cebu City treasurer nga si Ofelia Oliva.

Kini human makadawat sa order gikan sa Bureau of Local Government Finance si Oliva nga nagmando nga mo-report na siya sa Kapitolyo sulod sa usa ka buwan.

Si Oliva mopuli ni Provincial Treasurer Manny Guial kinsa gitudlo ni Acting Governor Agnes Magpale nga hulip ni Provincial Treasurer Roy Salubre kinsa nalambigit sa kasong grave misconduct uban ni Governor Gwendolyn Garcia.

Kasamtangang naka-official leave karon si Guial tungod sa giapilang mga seminars. Hinuon, pagbalik ni Garcia sa miaging semana, iyang gi-kanselar ang tanang official leave apan wala pa gihapon namalik ang lima ka department heads nga nag-leave, apil na si Guial.

Tungod niini, giingong ma-delay ang sweldo sa mga kawani sa Kapitolyo tungod kay si Guial ra ang makapirma sa mga tseke. Apan si Oliva miingon nga iyang susihon kung unsay iyang mahimo human niya mabasa ang mga reports ug dokumento sa Kapitolyo.

Karong adlawa, magpatawag si Oliva og meeting sa mga empleyado sa Treasurer’s Office ug ipatawag sad niya sa sunod nga semana ang mga municipal treasurers.

Wala mabalaka si Oliva sa mga problema sa Kapitolyo sa pangwarta ug giingon nga kaya ra kaayo niya ang trabaho sa treasurer’s office maski daghan og atubangon nga reports ug dokumento sa mga bayrunon sa Kapitolyo.

Niadtong bulan sa Enero, gipahibalo ni Magpale nga dako kaayo og utang ang Kapitolyo nga dul-an usa ka bilyon ka pesos apan kapin P80 milyones na lang ang kwarta sa lalawigan.

Si Oliva dihang gipangutana kung andam ba siyang modugay sa Kapitolyo kini miingon nga dugay na silang kaila ni Governor-elect Hilario “Junjun” Davide III ug sayod siyang dili kini lisod ikatrabaho.

Si Davide kanhi konsehal sa syudad sa Sugbo dihang si Oliva mao say City Treasurer sa maong siyudad. (BANAT NEWS)