VM Bucao mihilak sa iyang farewell speech

CEBU, Philippines - Wala kapugngi ni outgoing Vice Mayor Alan Bucao ang paghilak samtang nagpahigayon kini sa iyang farewell speech  sa miaging  Martes  sa buntag. Ang  maong sesyon  panamilit ug ika-117th Regular Session sa 4th Sangguniang Panglungsod sa Talisay.

Ang mga mipahigayon og farewell speech mao sila si Rodi Cabigas ug Bernard Joseph Odilao, outgoing councilor Celiapo Cabuenas kinsa napildi sa milabay’ng election ug si outgoing Vice Mayor Alan Bucao kinsa napildi usab sa milabay’ng eleksiyon.

Si Bucao sa iyang farewell speech  iyang gisubay   ang   mga isyu  nga gilabay kaniya sa iyang mga kaatbang sa milabay’ng eleksiyon.

Lakip   niini  mao ang kontrata sa Perfect Clean General Services,  nga kompaniya sa pamilyang Bucao diin sila maoy nakadaog sa bidding sa janitorial services  sa city hall.

Giingong ang pamilyang Bucao nakaginansiya og daku niini apan ang maong pasangil gihimakak sa bise mayor ug gani  gilakip niya ang breakdown sa mga gastohan sa gamiton sa pagpanglimpiyo ug ang sweldohan sa mga empleyado.

Matud ni Bucao nga gipasanginlan usab siyang nakakwarta sa renovation sa Talisay City District Hospital ug nakabaton usab kini og luna  sa barangay Manipis. Ang maong luna nga giingong napalit ni Bucao nakontrobersiyal  tungod kay usa ka timber land.

Apan matud ni Bucao dili ang luna ang iyang napalit kung dili ang mga tanom   lang sa tipik sa luna ug gawas niini, payag ang iyang  gipatukod  didto  ug dili tinuod nga  sementado.

Ang maong mga pasangil gihimakak ni Bucao ug wala niya kapugngi ang paghilak.

Gawas niini si Bucao mipasalamat sa   tanang misuporta kaniya ilabi na sa iyang pamilya ug nanghinaot siya nga ang mopuli nga administrasyon mohatag pa og dugang kalamboan sa siyudad. (BANAT NEWS)