Lalaki natuhog sa puthaw patay

CEBU, Philippines -  Patay ang 33-anyos nga lalaki nga nagmaneho og motorsiklo human giingong natuhog ang ulo niini sa steel bar nga misiwil sa cargo truck nga puno sa mga construction materials nga nag-parking daplin sa karsada sa barangay Cambanay sa siyudad sa Danao niadtong miaging gabii.

Ang biktima nga didto na mamatay sa tambalanan mao si Roel Landero, 33- anyos, minyo ug molupyo sa Sityo Pangdan barangay Cambanay siyudad sa Danao.

Ang nag-parking nga cargo truck gipanag-iya sa Federal North Hardware Inc. nga nagbase sa C. Padilla ning dakbayan sa Sugbo ug gimaneho ni Ronilo Garcia, nagpuyo sa Sityo Kabaasan Sandayong Norte sa Danao City.

Matud ni PO1 Rommel Costan, traffic investigator sa Danao City Police Station nga nahinabi sa Banat News ang biktima mao pay paggawas sa pinuy-anan niini aron moadto sa bukid. Ang cargo truck giingon gi-parking sa maong lugar tungod kay dunay giuli ang drayber diha sa ilang balay nga nahimutang sa maong dapit.

Apan giingong adunay nagsiwil nga steel bar sa luyong bahin sa trak ug maoy nakaigo sa biktima kinsa giingong kusog og dagan ug wala usab magsul-ob og helmet.

Pag-abot sa maong lugar tungod sa kangitngit sa palibot ug giingong wala usab mag –hazard signal ang trak  nalahos didto ang motor ug maayong pagkatusok sa nawong sa biktima dapit sa mata sa talinis nga steel bar ug natagak kini sa gimanehong motor.

Dali unta dayon kining gitabang sa mga tawo ug gidala sa Danao City District Hospital apan paglabay sa pipila ka gutlo nabugtoan gyud kini sa kinabuhi. Ang drayber sa cargo truck temporaryong gi-detain sa kapulisan. (Darrel A. Carumba/EIM)

 Magtiayong gikasohan tungod sa  pagpangilad gipabuhian sa piskalya

Ni Mylen Manto

Gipabuhian sa piskalya ang magtiayong gipasanginlang  sa pagpangilad sa usa ka  babaye ngadto sa usa ka negosyanteng ginang tungod sa kakuwang sa ebidensya.

Ang gibuhian mao ang magtiayong sila si Arthur ug Fe Pigon, pulos residente sa Sitio Tugasan, Guadalupe, Cebu City tungod kay wala silay direktang partisipasyon sa pagpangilad. Ang duha nangangkong igo ra silang gisuholan aron kuyogan ang gitumbok nga prime suspect nga si Jacquiline Guerrero nga taga barangay Malabang, Parang, Agono Rizal.

Matud pa nga giilad ni Guerrero ang usa ka babayeng negosyante nga taga V. Rama, Guadalupe, Cebu City sa pagpalit sa 12 ektaryang luna nga miabot og P15 milyones apan nasuta nga duna diay pending nga kaso sa Korte Suprema ang maong luna.

Kasong syndicated estafa ang gipasaka batok kang Guerrero sa mga sakop sa National Bureau of Investigation (NBI)-7 niadtong Biyernes sa usa ka entrapment operation. (Mylen Manto/EIM)

  Suspek sa pagtulis pagpatay sa call center agent sikop

Ni Lesley Caminade-Vestil

Gipasanginlang suspek sa pagtulis ug pagpatay sa usa ka call center agent diha sa dalan F. Cabahug sa barangay Kasambagan, Cebu City niadtong Huwebes sa buntag nadakpan na sa kapolisan sa miaging gabii.

Ang nadakpan mao si Pedro Taborada alyas PJ, 28, taga sitio Bangkal barangay Guadalupe ning siyudad.

Ang hepe sa kapolisan sa City Intelligence Branch Chief Insp. Romeo Santander mipadayag nga padayon pa nila karong gipangita ang lain pang kauban ni Taborada sa pagtulis ug pagpatay kang Jiovanni De Jesus niadtong Huwebes.

Unang nadakpan sa kapolisan sila si Pretty Rose Moneva ug Christian Saballa. Si Moneva ang gitumbok nga babayeng unang milabni sa bag ni De Jesus samtang si Taborada maoy gitumbok nga miduol ug mipusil sa biktima. (BANAT NEWS)