Suspek sa pagdagit ug paglugos sa 16-anyos nadakpan
CEBU, Philippines - Suspek sa pagdagit ug paglugos sa usa ka 16-anyos nga tinun-an didto sa West Poblacion Naga City, nadakpan sa kapolisan. Kagahapon sa udto nasikop sa mga sakop sa Regional Special Operation Group ang giingong mastermind ug mi-rape sa dalagitang tinun-an nga mao si Frederick Benedict Go alyas Fedic o Bedic.
Matud pa sa hepe sa Anti-Human Trafficking Group sa Regional Intelligence Division Sr. Insp. Maria Theresa Macatangay nga dihang nakakuha sila sa hulagway ni Go, ila gilayon kini nga gisuhid ang mga lugar kun asa kini mag-adtoan.
Kagahapon sa udto nasigpatan si Go sa usa ka restaurant sa San Antonio Village sa Tabada Extension Culvito Dos sa Mambaling. Gikatahong misuway unta sa pag-ikyas si Go, apan nakuptan gihapon kini sa kapolisan.
Kagahapon ang biktima didto sa buhatan sa RID ug positibong miila sa suspek. Dugang pa ni Macatangay nga usa ka bigtime drug personality si Go ug gani ang iyang mga areas nga huluganan mao ang dakbayan sa Sugbo ug pipila ka lugar sa lalawigan sa Sugbo.
Samtang ang ginikanan sa biktima nga nagdumili sa pagpa-interview nagpasalamat sa kapolisan apan nanghinaot nga masikop pa ang ubang kauban ni Go.
Kahinumduman nga niadtong Miyerkules sa miaging semana, gikatahong gidagit ang 16-anyos ug gipasakay sa usa ka van ug gidala sa Pung-ol Sibugay sa Cebu City ug didto gi-gang rape ang biktima apan nakahigayon kini og ikyas.
Kasong Illegal Detention ug Rape in relation to RA 7610 ang posibling ipasaka batok kang Go ug mga kaubanan. Si Go dihang gikuhaan sa iyang habig bahin sa mga pasangil kaniya mihimakak sa tanang alegasyon batok kaniya. (BANAT NEWS)
- Latest
