Kataposang sesyon sa Hunta wala mahinayon

CEBU, Philippines - Wala makapahigayon sa ilang katapusang sesyon ang kasamtangang mga sakop sa hunta probinsiyal sa Sugbo kagahapon.

Kini human wala mitunga ang mayoriya sa mga sakop niini ug sila lang si Bokal Julian Daan, Alex Binghay, Sun Shimura ug Jose Ribomapil Holganza Jr. ang nanambong.

Si Bise-Gob. Agnes Magpale na unta ang mangulo sa sesyon human sa unom ka buwan nga siya ang nahimong kasamtangang gobernador samtang si Daan ang nihulip kaniya.

“Humana sad ang akong katungdanan, as acting vice governor, natapos na ang tanan,” matud pang Daan.

Gikatakda unta kagahapon ang pagpasidungog sa mga sakop nga mobiya na sa pwesto human sa niaging eleksiyon.

Sila si Bokal Sergio Restauro ug Caesar Ian Geronimo Zambo parehong napilde sa ilang pagpasubli samtang si Bokal Wilfredo Caminero napiling kongresista sa ikaduhang distrito.

Hayan atol na sa inaugural session karong Lunes sa bag-ong mga sakop sa hunta probinsiyal mapahigayun ang pagpasidungog sa tulo ka mga bokal nga dili na makabalik sa pwesto.

Nasayran nga adunay tagsatagsa ka rason ang mga wala nitunga sa sesyon kagahapon. (/EIM)  (BANAT NEWS)