2 sa 4 ka suspek nga mitulis sa call center agent sikop
CEBU, Philippines - Human pusila ang usa ka call- center agent niadtong miaging Biyernes sa kaadlawon didto sa dalan F. Cabahug, barangay Kasambagan, dakbayan sa Sugbo nasikop ang duha sa upat ka mga suspetsadong kriminal.
Ang mga nasikop mao sila si Christian Saballa, hingkod, ug Pretty Rose Moneva, nga pulos molupyo sa barangay Guadalupe.
Ang biktima nga si Jovanni de Jesus, gidughan pagpusil patay kay wala ihatag niini ang iyang bag nga gisuwayan sa pag-ilog sa usa ka babaye.
Human sa maong insidenti, ang homicide Section ug City Intelligence Branch mipahigayon dayun og follow-up operation ug gisuhid ang tanang impormasyon nga ilang makuha.
Niadtong Sabado ilang nasigpatan ang duruha nga susama gihapon ang modus nga ubanan sa babaye ang ilang tulison. Inig-abot niini sa mingaw nga lugar adto na kini bawi-i sa butang nga ilang kuhaon sa ilang biktimahon.
Tungod niini, gisikop sa kapolisan ang duha human sila makabiktima sa nakuhaan nila sa mahalong cell phone, pitaka , ug uban pa.
Nabawi usab sa kapolisan ang sakyanang maoy gigamit isip get-away vehicle niini niadtong ilang gitulis ang call center agent.
Ang hepe sa kapolisan sa dakbayan sa Sugbo, Sr. Supt. Mariano Natuel Jr. mipadayag nga base sa gibutyag sa ilang saksi ug sa ilang pagpakita sa duha ka dinakpan positibo gayud kining gitudlo.
Matud pa ni Natuel nga aduna pa silay laing duha nga gipangita nga maoy giingong mipusil sa biktima. Ang duha ka dinakpan, miangkon nga nanulis sila niadtong Sabado sa udto ug first time sila nga misulod sa maong bisyo.
Apan gihimakak sa duha nga aduna silay kalambigitan sa nahitabong pagpanulis ug pagpusil patay kang de Jesus.
Kahinumdoman nga niadtong Sabado sa alas 5:00 sa buntag giingong giubanan sa suspetsadong babaye ang biktima .
Dihang nahiabot na kini sa usa ka autoshop kalit lang nga gilabnot ang bag sa biktima apan nagdumili kini sa paghatag hinungdan nga miduol ang usa ka lalaki nga maoy mipusil patay sa biktima.( /WC) (BANAT NEWS)
- Latest
