Relocation site gipatukoran og day care school

CEBU, Philippines - Gikalipay sa mga ginikanan sa kabataan nga nagpuyo sa relocation site nga  luna sa barangay Paknaan, dakbayan sa Mandaue   kay  patukoran  usab  sila  og  day care  center  sa  maong  lugar.

Si Engr. Daisy Toledo, nga  maoy  president  sa Philippine  Institute of Civil Engineers Inc.(PICEI) maoy  nanguna  sa maong  kalihukan  sa pagtukod  sa maong  day care center.

Miingon  si  Toledo  nga  mao  kini  ang  sulbad  sa suliran  sa  mga  ginikanan  nga  may  gagmay  nga  mga  anak  kinsa  nahasol  pag-ayo  sa paghatud  sa ilang  mga  anak  nga  moeskuyla  sa day care . Kini  tungod  kay  layo  ang  eskuylahan  ug  makalangay pag-ayo  sa  ilang  panginabuhi.

Maoy  hinungdan  nga  nagkasabot ang  mga  sakop  sa PICEI  ug  ang  Cebu Contractors Association Inc (CCAI)  ug gihimo  dayon  ang  ground breaking  nga seremonya  sa  miaging  adlaw.

Si Engr. Toledo  miingon nga ang desinyo sa tukoron nga edipisyo   ilang gisunod sa prinsipyo   sa  “green engineering.”

Gitataw niya nga ubos sa maong desinyo  makita ang natural lighting ug natural ventilation nga dili lang masinati ang kahamugaway kun dili masinati usab ang iyang kahayahay.

Dugang pa niya nga duha ka andana ang tukoron nilang edipisyo nga may gidak-on  nga  63 metro kuwadrado ang gilapdon  sa hawanan.

Ang  maong  eskuylahan  may tangke usab  sa tubig  aron kapundohan  kini   ug  dili  kawad-an  og  tubig  ang  mga  bata  nga  magtungha. Si Violita Cabada nga maoy pangulo sa Mandaue City Social Welfare Services nga nahinabi sa mga tigbalita miingon nga ilang ipahigayon ang duha ka hugna nga klase sa mokabat  og 30 kapin ka mga bata .

Ang  pangidaron  sa maong  mga  bata  nga  motungha  sa day  care  anaa  sa tulo ngadto sa upat ka tuig.

Matud pa ni Cavada nga ang maong day care center nga  tukoronon,  maoy ika-39 nga day care center sa dakbayan sa Mandaue.

Si  Paknaan Barangay Kapitan Malaquias Soco nga maoy naningkamot sa kaugmaran sa maong edepisyo miingon nga ang tukoron nga day care center sa Paknaan maoy ikatulo na nga day care center nga napahimutang sa iyang barangay.

Dugang pa niya nga maningkamot siya nga ikapahimutang ang mga lingkoranan sa higayon nga mahuman na ang  maong  edipisyo pinaagi usab sa paghangyo sa Visayan Electric Company nga maoy modonar niini.

Si Engineer Paul Dy nga maoy presidente sa Cebu Contractor Association  Inc., miingon  nga ang day care center nga ilang pagatukoron nagkantidad og P390,000 ngadto sa P400,000 ug gikatakdang mahuman kini sulod lamang sa 45 ka adlaw nga gidugayon.( /WC) (BANAT NEWS)